September 15, 2011
1988 ning May – June shata aten laman hta Du Jum Nban La woi awn ai KIA (253) Dap Dung hte Major Sau Chang woi awn ai Dap Dung(3) pawng nna Hpyen Zai Ladat Masat -1 (Tact 1) ngu nna hpaw ninghtan nhtawm sinpraw Dingda Pangwa-Kampaiti ginra e dap jung tawn ai 101 CPB(Northern) Layawk Ze Lum/ Zahkung Ting Ying yan woi awn ai hpyen hpung ni hte shawng nnan kanawn mazum hpang wa sai. Dai ten myen tai hpyen hpe ninghkap gasat na matu KIA Dap Nawng hpyen hpung kaba ni hpaw shabawn let Tact-1, Tact-2 the Tact-3 ngu masat garan nhtawm gasat woi ai ten mung rai nga ai. Tact-1 hpyen hpung hpe gaw Du Jum Nban La kaw nna madung woi awn ai rai nga ai.
Ngai shang lawm ai KIA 253 Dap Dung mung KIA Dap Dung(3) hte Sadung lam Num-nawn lam mashe kaw myen hpyen hpung langai hpe majan gasat awng dang ngut ai hpang kaga hpyen majan masing ni a majaw CPB 101 ni a ginra rai nga ai Kampaiti Mare ga jarit e wa hkring nga saka ai, anhte hpyen hpung ni Kampaiti du shang wa ai ten Myen hpyen ni bai htingnut mat wa ai hpang Kampaiti mare kata/shinggan shara shagu Hkam Bawm(Personal Mines) ni hpe tsa lam hku hkam kau da ai sha n-ga mare kata mu ai du sat yam nga yawng ngu na daram hpe gap sat sharu tawn ai majaw nau manam sawng nna nsa sa pyi nhkru ai zawn nga ai aten rai nga ai, mare kata na rung, dum nta ni gaw yawng ngu na daram wan nat jahten kau da ma ai. Hka shi hkan mung masha mang hte dusat mang ni si, yet, bawm, rawng nga ai majaw hka ja lu na matu mung nmai, grai jam jau ai aten rai nga ai.
Shaning (23) ning na ai hpang Lamu de na mu lu ai ya ten na(2011) Kampaiti Mare Shanglawt Hpyen la marai (200) jan gaw lahkawng masum ya Bum Lam hkawm wa ai raitim Mare du ai hte hkringsa na nmai byin, Kampaiti mare kaw du ai hte tinang yup na shara, shadulu shadu-sha na shara ni hta Bawm shawng seng kau nna lahkawng ya daram shani shana, nsim nsa Bawm seng ai ni gaw seng, Masha Mang, Du-sat Mang ni hpe lahkawn htu lup ai ni mung nhkring nsa di galaw ngut ai hpang she Kampaiti mare gaw shinggyim masha ni nga mai na shara zawn tsam-ri byin wa ai rai nga ai. Shingrai bat lahkawng masum mare hpe bai gaw sharawt ai bungli hpe nhkring nsa galaw wa ai hte maren Kampaiti Mare gaw Mare bai byin wa nga sai. Shanglawt hpyen hpung a matu lu sha na matu Miwa N-gu, Jum hte mare ting hta tu nga ai Wa-lai, Hting-ke ni rai nga ai, apawt sha ngam ai chying-hkrang matsun bai prut wa na hpe ala ai mung myit galu na zawn nrai nga ai..bai prut wa ai chying-hkrang matsun mung tinang hta atsam grau nga ai ni shawng lu di ai majaw atsam nnga ai dap chyen (section) ni a matu gaw walai hte hting-ke hpe sha zingri na lam chyu rai nga ai.
Shanglawt Hpyenla ni garum la ai majaw Kampaiti mare gaw sharawt bungli mung ram ram hkrang pru wa sai hte maren majan koi yen mat ai mare masha ni mung 5/6 daram bai du pru wa ma ai, mare masha nkau gaw Kampaiti kaw na nayi hkum mi chyen(1:30 hrs) daram hkawm yang ga jarit makau, Miwa mung kata na Hin-Nyin Htang ngu ai mare hkan agat atsat hprawng yen nga mat ai rai nna nkau gaw Miwa-Myen Lam(Kampaiti Lam) kaba galaw nga ai Miwa ga na Lamhtu ai masha ni a camp hkan dut-lu dut-sha nga shajang ma ai. Kampaiti kaw dai ten 101 Communist hpyen hpung a salang ni ngu rai nga ai, Du Wa-Am, Du Malang, Du Maji Zau Tawng hte Kyit-hkai Du (Set-twe-ye-mu) ni rai nna shanhte gaw shanhte a dum nta masha ni hte rau rai nga ma ai, kaga hpyenla ni hpe gaw nau nmu mada ai daram re.. kalang marang majan masing shing nrai ahkyak ai bungli nga wa yang marai 15-20 daram bai pru wa ma ai.
Shanglawt hpyen la ni shata lahkawng masum nga na wa sai the maren, Miwa mare de sa dat, ga jarit e lam htu nga ai miwa bungli galaw dabang de sa chyai hkawm rai..September shata praw de du wa ai hte maren marang mung htu kashung mung grai kashung ganoi Nshungta du wa ai zawn nga wa ai ladaw de du wa sai.
Lahpawt myi hkying 8:00 AM daram hta wan-mang makau e wan kra let radio hpaw madat nga ga yang, Camp Incharge (KIA hpyen hpung a shani shagu na bungli hte Rit-kawp ni hpe yu reng ai wa) Sergeant Major(Mi-jat-Du) Labang wa ngai nga ai nta (Sum) kata shang wa ai, kata de du jang “Agyi wa..Dujum Nban..matsun dat ai..nang hpe ..daihpawt nnga mat sai Laknak Kaba Dap na Agyi Hpau-sam a moi-mang hpe kyu hpyi ap woi na hku re da” ngai gaw kalang lata na kajawng let “hpa baw..da-aw” ngu bai san dat ai hpang ..Myi-jat Labang mung ngai hpe chye na ya ai ngu ai lachyum hte ngai hpe yu let ngai hpa baw bai matut tsun wa na sha matut la nga ai, ngai hku nna gaw shawa hpawng kaji zawn re hkan pyi kyu hpyi woi yu ai la wa bai n rai.. nga yang Mi-jat Labang a matsun ai ga pyi nhtum shi yang nye a kara(hair) ni lamu de marawng mat ai zawn she nga mat sai..shingrai hpa ngu na pyi nchye tsun ai zawn nga mik-mak taw nga yang Mi-jat Labang kaw na..”hpami rai rai Agyi wa nang hpe sha kam saka ai yaw..ngai ra ai lam wa hkyen tawn magang na..nang jin ai hte lup de kalang lata sa wa ga” Mi-jat Labang nhtang mat wa ai shaloi myit hpe shazim nhtawm ngai hpabaw galaw hpang na shawng myit hpang ni ai..makau hkan na hpyenla ni hpe yu dat yang, shat sha kyu hpyi na pyi chyip she re ni law malawng..ngai hku nna nye manang ni hpe shawng myit dum dat sai..hkau Lahpai Zau Raw (ya Dap Ba -4 Dap Up) hte hkau Bawk Htun (ya Florida kaw nga ai) yan gaw Dap Dung(3) ginra shawnglam de madung bungli ang ai majaw myi nnan kaw na Kampaiti de nlawm masai rai..ngai hte rau Kampaiti de bungli ang ai hkau Hkangda Brang Shawng (pru hkringsa) rai yang mung Miwa de n-gu gun bai rawt mat wa..katsi dik ai jahpawt raitim..nye a matu gaw Salat she gali wa ai zawn nga taw sai..Hpung Up Hpung Tau ngu ai gaw Kampaiti Mare kaw na yawm dik lahkawng ya daram hkawm yang she du mai ai shara kaw nga ai hpe soi sam na chye lu ai…dai pyi hkrak chye ai masha kadai nnga.
Shawnglam ginra hta kyu hpyi gawan nga ai Hpung magam gun langai hte rau kade myit yu tim koi yen na lam nmai byin mat sai..mahkrum madup hku sawn shachyaw yu yang mung Kyu nlu hpyi ai sha majan pa makau hkan htu lup makoi mayang kau da sai amyu sha ni a Share Shagan ni hpe bai myit yu.. rai..jahtum e kalang mung mahkrum madup nnga yu tim lit la na matu dawdan sai..dawdan ai hte maren kalang lata dum dat ai lam gaw… Majan pa de n-yu wa shi ai ten (1987 May shata) Na Hpaw Bum e naw nga nga yang Kanau Sumlut Gun Maw (ya Tau Dap Awn Daju) ngai hpe kumhpa jaw ai, ta lahpan daram sha pa ai “The Gideons” English Chyum Laika kasha hpe rai nga ai..chyum mungga ni hpe lata na matu mung law law nchye ai majaw..Na hta ayan na mawn taw nga sai..John 3:16 hpe lata nhtawm kalang myi bat hti shaman sai..dai hpang ngai galaw sa wa na bungli hpe Karai Kasang lata hta ap sai..
Lup kaw du yang gaw Mi-jat Labang hte hpyenla 6-7 daram ngai hpe ala nga ma ai..Mi-jat Labang kaw nna Hpyen Htung Tara hte maren Magam Dap kaw na shapraw nhtawm sa mayu ai de sa na matu Aming hti ngut ai hpang ngai kaw na English hku chyum laika hti..dai hpang nnga mat sai Agyi wa a Wenyi hpe Karai Kasang Lata de ap ai akyu hpyi ai hte kadun ai hku makoi mayang lamang hpe awng dang ai hte galaw la lu ga ai. Hpyenla ni gaw ngai hpe grai chyeju dum ma ai..ngai chye ai gaw..KIO Ginjaw hte Sinpraw Ginwang Ginjaw ginra ting hta Hpung Up ngu nna shara shagu shani shana nsim nsa lit la gun hpai lai wa ai gaw Sara Kaba Rev. Lahpai La Ring hkrai sha rai nga ai, dai shaning aten ni hta KIA hpyen hpung ni hku nna shaning tup raitim makam masham hpung sara langai hpe mu lu na matu nloi ai.
Ya gaw, KIO Ginjaw ginra sha nrai KIA hpyen Dap shagu hta nawku makam masham hpe ram ram n-gun dat wa sai hpe na lu ai..mungdan magam bungli zuphpawng shagu hta kyu hpyi ap ai lam hpe tup hkrak galaw nga ai hpe mu lu sai..KIO/KIA ningbaw ningla ni kaw nna mung Karai hpe manoi ai lam na chye lu sai..manang nkau phone hte shana wa ma ai ”ya hte gaw anhte kaw na hpyenla ni Lu Sha Gam kyu hpyi nga ma ai” nye a Na pyi nkam na zawn nga… mau ai zawn kabu ai zawn gayau gaya hkam sha mat nngai. Majan rawt wa na hpyen hpung ni hpe mung hpung up hpung sara ni kaw na kyu hpyi majai ai sha n-ga Hpung magam gun ni shawnglam ginra du hkra sa du kyu hpyi gawan hkawm ai lamang ni galaw nga sai lam na lu ai shaloi..July 12-13 laman Laiza Muklum e galaw ai Jinghpaw Wunpawng mung shawa mung masa ningmu la zuphpawng e Dap Awn Daju Du Kaba Gunhtang Gam Shawng tsun ai ”ndai majan hta..ntsa na wa..lawm sai” ngu ai ga gaw teng teng nan rai sai ngu hkam la nngai..ndai kaba la ai sasana bungli hpe Laiza Buga Hpung ni kaw na woi awn galaw nga ai hpe na lu ai majaw..shanhte galaw nga ai Sa-sana bungli ni a lam Wungpawng mung shawa ni hpe htawm hpang de tsun htai dan na re ngu mung kam dat nngai. Matut nna Dap Kung, Dap Dung atsang hkan du hkra hpyen magam gun Hpung Up, Hpung Sara (Chaplain) ni lu hpaw shabawn wa lu ai htawm hpang shawnglam hpe shingran let..nye a mahkrum madup shingran hpe garan kachyan dat nngai rai. Majan pa hta mungdan hte amyu sha ni a matu asak ap nawng mat wa sai nye a manaw manang share shagan ni hpe hkungga jaw dat nngai.
Ka ai – Yu maya magam gun dingsa