KIA Pawnghpawm hpyen hpung ni, Je Hkam myen hpyen dap gasat zing.

Je Hkam Myen hpyen gumshem hpe KIA, KPDF hte AA  pawnghpawm hpyen hpung ni February (16) ya shani kaw nna htim gasat hpang ai, February (19) ya shani zep zi htim gasat zing la lu ai lam chye lu ai.

Manmaw, Manje ginra kata Sammung jarit hte ni kahtep ai shara rai nga ai Je Hkam Myen hpyen gumshem dap (15, 121, 223, 276) ni pawnghpawm nga ai byuha shara hku nna Myen hpyen ni a malu masha, hpyen lang arung arai htaw ginlen ya nga ai shara daju langai re lam Shawng lam lit nga ai salang langai tsun ai kaw na mung kahtap chye lu ai.

Myen hpyen dap maga hku na Nhtoi (4) ya laman Nbungli hte numdaw (70) lang daram ninghkap gasat ai majaw mungshawa dum nta law law  hten za hkrum mat ai sha n-ga ginra masha (30) daram hkra hkala hkrum nna marai (6) asak si sum ai lam na chye lu ai.

KIA Masat (3) Dap Ba kata na KIA pawnghpawm hpyen hpung ni 2024 ning shaning nnan daw laman hta sha Gawkngu Yang kaw dap jung ai Myen hpyen gumshem dap Hk.M.Y (424), Mabing Kung Mahkan Myen hpyen gumshem dap Hk.L.Y (223,276), Man Wing Gyi, Kawng Hkang Myen hpyen gumshem dap Hk.M.Y (424), hte Bang Hkam pawnghpawm shagyit, Kaihtik kaw dung ai Myen hpyen gumshem dap Hk.L.Y (102) hte Balawng Dingsa kaw dung ai Myen hpyen gumshem dap Hk.L.Y (250) ni hpe gasat zing la lu sai re.

Ndai laman Myen hpyen gumshem dap gaw Myu mare kaba hte shahte a shagyit shara ni hta hpyen lahkawn la ai lam ni matut manoi galaw wa ai hta Jinghpaw mung kata Myitkyina kaw mung lai wa sai bat laman hta Naura pa mayan kaw nga nga ai ramma nkau hpe mung sa rim woi mat ai lam ni nga ai zawn Mogaung, Monyein, Hopin ginra na P.T.Ts hpung ni hpyen laja lana lahkawn ai lam ni galaw nga ai re

Leave a Reply

*

This site uses Akismet to reduce spam. Learn how your comment data is processed.