KIA kawn Myen hpyen gumshem dap nkau hpe bai htim gasat zing la.

2024 ning February (3) ya shani Nam Tin Myen hpyen gumshem dap hpe KIA Masat (9) Dap Ba kata na pawng hpawm hpyen hpung ni htim gasat padang dip zing la lu ai lam na chye lu ai.

Dai hta n-ga lai wa sai January praw (2) ya shani KIA Masat (1) Dap Ba, Masat (7) Dap Dung ginra, Hkrang Hti Dam Myen hpyen gumshem dap Hk.L.Y (137), Hk.L.Y (46) hte P.T.Ts ni a hpyen dap hpe KIA pawnghpawm hpyen hpung ni htim gasat zing kau lu ai lam nga sai re.

KIA Masat (5) Dap Ba makawp maga ginra kata hta mung Myen hpyen gumshem dap hte KIA pawnghpawm hpyen hpung ni gasat poi byin nga ai ten, Myen hpyen gumshem dap ni Nbungli bawm jahkrat gasat ai lam ni galaw ai majaw, January (3) ya shani KIA Masat (1) Dap Nawng Daju, Masat (252) Dap Nawng Dap Dung makawp maga ginra, Na Hpaw Myen hpyen gumshem dap de machyu pala sinat laknak htaw sa ya ai Helicopter Nbungli langai hpe gap jahkrat kau ya lu ai lam nga sai re.

January (5) ya shani KIA Masat (5) Dap Ba makawp maga ginra Da Law mare kaw na ginra P.T.Ts dap hpe KIA hpyen hpung ni wang gap zing kau nna hpyen lang arung arai laknak machyu pala ni hpe mung zing la lu ai lam na chye lu ai.

KIA Masat (3) Dap Ba ginra Gawkngu Yang kaw dap jung ai Myen hpyen gumshem dap Hk.M.Y (424) dap hpe mung KIA pawnghpawm hpyen hpung ni January (19) ya shani htim gasat zing la nna, January (21) ya shani Mabing Kung Mahkan Myen hpyen gumshem dap Hk.L.Y (223,276) dap, Man Wing Gyi, Kawng Hkang Myen hpyen gumshem dap Hk.M.Y (424) dap hte Bang Hkam pawnghpawm shagyit ni hpe dai shani hta sha KIA hpyen hpung ni htim gasat zing la ai sha n-ga Kaihtik kaw dung ai Myen hpyen gumshem dap Hk.L.Y (102) dap hpe mung January (29) ya shani KIA hpyen hpung ni htim gasat nna zep zi zing la kau sai lam sagawn chye lu ai.

KIA Masat (9) Dap Ba ginra hta mung January (20) ya shani Masat (6) Dap Dung ginra, Gwi Hka Myen hpyen gumshem dap Hk.L.Y (42) dap hpe KIA hpyen hpung ni htim gasat zing kau lu sai lam mung nga ai.

KIA Masat (4) Dap Ba, Masat (8) Dap Dung ginra Namhpakka Myen hpyen dap Hk.L.Y (123) dap hpe mung KIA Masat (4) Da Ba, Masat (6) Dap Ba, Masat (10) Dap Ba pawnghpawm hpyen hpung ni htim gasat zing la lu ai zawn, Myen hpyen gumshem dap a Jet Fighter langai gap jahkrat kau ya lu ai lam nga sai re.

Dai hta sha n-ga KIA Masat (2) Dap Ba ginra kata rai nga ai Dalu kaw dap jung ai Myen hpyen gumshem dap Hk.L.Y (86)  dap hpe mung January (28) ya shani KIA pawnghpawm hpyen hpung ni htim gasat zing la lu ai lam nga ai.

2024 shaning nnan daw January shata laman hta sha KIA hte Myen hpyen gumshem dap ni gasat gala majan (35) lang byin nna KIA pawnghpawm hpyen hpung ni kawn gasat zing madu la lu ai Myen hpyen dap yawng (10) a lahta rai sai lam na chye lu ai.

Leave a Reply

*

This site uses Akismet to reduce spam. Learn how your comment data is processed.