Sinna Ginwang Ginjaw, KIA Masat (45) Dap Dung ginra, Sumbwi Yang ginwang kata hta magam dap hte uphkang dap salang ni pawnghpawm nna ka-ni nanghpam pat jasan ai bungli shang ai lam ni galaw nga ai re hpe sagawn chye lu ai.
August (29) ya shani hta Sumbwi Yang Ginwang ningtau uphkang Du woi awn let Ginwangdaw, ninghtawn uphkang Du ni marai (39) shanglawm let Makaw Ginwangdaw uphkang ginra Lido lam lawu maga de ginra gawan nhtawm pat jasan bungli shang ai sha n-ga Sumbwi Yang ginwangdaw uphkang ginra rai nga ai Dahkyet mare hte Hkalung mare lapran Lido lam kaw mung magam dap de na lit nga salang ni kawn lai wa lai sa Modo, Cycle ni hpe hkap jahkring nna ka-ni nanghpam sawk jep bungli shang ai lam galaw sai hpe chye lu ai.
Lai wa sai August (28) ya shani hta mung Makaw ginwangdaw uphkang ginra kata hta Masat (45) Dap Dung de na magam gun salang ni hte ginwang uphkang salang ni pawnghpawm nna ginra gawan hkawm ai lam galaw ai sha n-ga lai wa lai sa hkrun lam hkawm masha ni hta ka-ni nanghpam sawk jep bungli shang shamu shamawt ai lam nga sai hpe chye lu ai.
KIO Asuya kawn mung ka-ni nanghpam hpe madung hpyen hku masat let ja ja ninghkap gasat shamyit sa wa na matu tsun ndau da ai lam nga ai hta Sumbwi Yang ginwang kata ka-ni nanghpam lu sha masha hte dut hpa ga galaw masha lawt jat nga ding yang naw rai nga ai majaw tinang a uphkang gaiwang kata hta ka-ni nanghpam hkoi tsai wa lu na matu yaw shada let pat jasan ai magam bungli hpe galaw nga ai re lam seng ang ai lit nga salang ni tsun ai.
Lai wa sai ten hkan mung Sumbwi Yang ginra kata ka-ni nanghpam lu sha masha hte dut hpaga galaw masha grai law wa ai majaw ka-ni nanghpam jen jep ai pat jasan ai magam bungli ni shang ai hta ka-ni nanghpam law law hpe rim zing la lu ai zawn ka-ni nanghpam dut hpaga galaw masha ni hpe rim ahkyak la ai lam ni galaw ai lam nga sai sha n-ga matut nna mung pat jasan ai magam bungli hpe matut ndi galaw nga ding yang re.