Mungmyit sinli ginra,Nam Um mare de Mungbaw Hka mahkrai kaw dap Jung nga ai Myen hpyen gumshem dap kawn sinat kaba (3) lang gap shadam ai kaw nna sinat kaba si (1) Mare kata hkrat kapaw ai lam ginra masha ni shana wa ai kaw nna chye lu ai.
August (27)ya shana daw hking (02:45) daram hta Nam Um mare modo lam kaba kaw TNLA Masat (7) dapba kata na hpyen hpung ni Laiwa laisa modo ni kaw hkunkang hta nga ai ten Myen hpyen gumshem dap kawn (81) MM ngu maram lu ai Laknak kaba gap shadam ai majaw, Jan Dabang Htu a Dum nta Wang kaw hkrat kapaw ai lam na chye lu ai.
Jan Dabang Htu a nta kaw hkrat kapaw ai hta nta Masha ni hkra hkala ai lam n nga ai raitim dum nta hka shin lawng hten mat ai hte Pala hkyep nkau Nam Um KBC nawku hpung Nta kaw wa hkra nna chyinghka kaw shakap da ai pat hten mat ai lam ginra masha langai tsun ai.
Mungmyit sinli ginra hta myen hpyen gumshem dap kawn Laknak kaba hkrup mara gap shadam ai majaw mungmare Masha si hkala hkrum ai mabyin ni byin Lai wa sai Myen hpyen gumshem dap kawn August shata praw kaw nna Hpyen n-gun jat htu shadut chyinglau hkawm ai majaw Majan laja Lana byin wa na hpe mungmasha ni myit tsang nga ai re.
Wunpawng mungdan shanglawt hpyen Dap,Masat (6)dapba, masat (9) dapdung hpyen hpung ni hte Tsun lung mare kaw nna jahpawt manap hking (04:00) daram rawt lung wa ai Myen hpyen gumshem hpyen hpung ni hpe August (28)ya shani (12:15)pm hte hking (01:40)pm daram hta Lai hpau kawng kaw numdaw (2)lang gasat poi byin ai lam shawnglam lit nga salang shana wa ai kaw nna chye lu ai.