Sinna Ginwang Ginjaw, Aawng Lawt Mare Shanglawt Asuya Lawu Tsang Lai Jawng a 2022-2023 ning hpaji ladaw a jawngma shagrau sha-a poi hte Kanu Kawa hkrum zup bawngban hpawng lamang hpe August (18) ya shani galaw ai lam nga ai.
Hpawng lamang hpe Awng Lawt mare gawk nu kaw jahpawt hkying (10:00) aten galaw hpang ai rai nna, Sinna Ginwang Ginjaw Pati Komiti Amu Madu Dkb.Pawm Mung Ra hte rau Sinna Ginwang Ginjaw Hpaji Dap Ningtau Lithkam Srkb.Tingring Zau Ring, mare uphkang salang ni, jawngma ni hte jawng sr magam gun ni, jawngma kanu kawa ni sa du shang lawm ai sai re hpe chye lu ai.
Lamang daw lahkawng hku galaw ai hta ningtawn jawngma ni hpe shagrau sha-a ai lam nga nna Sinna Ginwang Ginjaw Hpaji Dap Ningtau Lithkam Srkaba, Tingring Zau Ring kawn mung KIO Asuya a hpaji masa lam gara masa hku sa nga ai ngu lam ni, hpaji sharin achyin ai daw hta gara hku shakut nga ai ngu lawng lam ni hte seng na du sa wa ai Kanu Kawa ni hpe chyip makup mungga jaw la ai lam nga sai re.
Dai hpang jawng ma ni a atsam madun lamang ni galaw nna, jawng sr magam gun ni, jawng ma ni, jawng ma Kanu Kawa ni hte jawng komiti Kanu Kawa ni hkrum zup nna jawng a matu ra mara bawngban daw dan la ai lamang bai galaw sai re hpe chye lu ai.
Awng Lawt mare Shanglawt Asuya Lawu Tsang Lai Jawng hta KG kaw nna tsang (9) du hkra hpaw sharin nga nna jawng sr magam gun marai (19) hte jawngma marai (223) laika hpaji sharin hkam la nga ai jawng re hpe chye lu ai.