Sinna Ginwang Ginjaw, Lawt Awng mare (KBC) nawku jawng wang kaw ningshawng tsi gawn lajang hpaji (First Aid) hte seng nna woi hkaja ai wunkat sharin hpawng galaw ai hpe chye lu ai.
N-dai sharin hpawng hpe Sinna Ginwang Ginjaw Hkamja Dap kawn woi-awn galaw ai rai nhtawm August (14), (15) lahkawng ya tup jahpawt hkying (9:00) Am kaw nna shana de hkying (4:00) Pm aten du hkra lata tut woi hkaja sharin ya sai re lam Sinna ginwang ginjaw hkamja dap lit nga ai ni tsun da ai kaw na chye lu ai.
Ningshawng tsi gawn lajang hpaji hpe Htinggaw dek, hkum ding dek hkyak hkyak hkala nba hkrum wa yang tsi rung de garai nlu du shi ai laman hkala hkrum ai wa hpe tsi gawn lajang ya lu na matu yaw shada let n-dai sharin wunkat hpe sharin ya ai re lam, N-dai ningshawng tsi gawn lajang hpaji gaw hkum ding dek chye da ging ai hpaji re majaw yawng hte sharin hkaja da ra ai hpaji re, matut nna mung ndai hpaji hpe masa hta hkan nna Mung mare masha ni hpe hkan sharin ya na masing mung nga ai lam Sinna Ginwang Ginjaw Hkamja Du Dkb.Nbyen Tu Awng tsun ai.
Ningshawng tsi gawn lajang hpaji sharin wunkat hta Lawt Awng Mare masha ni, Ramma ni, Jawngma ni yawng marai (90) sa du sharin hkaja hkam la sai re.