Wunpawng Mungdan Shanglawt Hpyen Dap, KIA Masat (9) Dap Ba, Masat (6) Dap Dunng ginra, Kasen Bum Ginwang Daw, Maw Lung ningtawn kata, Hpri Bum ntsa kaw dap jung shara jahkrat nga ai Myen hpyen gumshem dap Hk.M.Y (119) na hpyen dap hpe Agust (7) ya jahpawt manap hkying (5:40) daram hta KIA pawnghpawm hpyen hpung ni sa htim gasat zing kau ai lam na chye lu ai.
Gasat poi hta Myen hpyen gumshem dap maga si hkala hkrum ai lam law ai majaw Tamahkan mare kaw dap jung nga ai Myen hpyen gumshem dap, Lamawng Myen hpyen gumshem dap, Seng Tawng mare lawk (1) kaw nga ai Myen hpyen gumshem dap, Masat (30) Myen hpyen gumshem Balik dap hte Tatma (33) ni kawn Nam Maw mare Bum hte Hpri Bum grup yin ni de laknak kaba nhkring nsa gap garum ai lam nga ai hte shiga lawnglawm hkum tsup hpe naw matut sagawn nga ai re.
Dai shani hkying (11:00) aten daram hta mung KIA Masat (9) Dap Ba, Masat (26) Dap Dung makawp maga ginra Se Zin lawu, Nang Kada maga hku nna KIA ginra de shamu shamawt chyinglau lung wa ai SNA Sam hkyeng P.T.Ts hpyen hpung ni hpe KIA hpyen hpung ni hkap shingla gasat dat ai lam nga ai re hpe matut chye lu ai.
KIA Masat (3) Dap Ba, Masat (12) Dap Dung ginra Mali Hka lam hku lawu Myen Mung de na lung wa ai Myen hpyen gumshem dap a hpyen n-gun, laknak arung arai, malu masha htaw lung wa sanghpawli (9) hpung ni hpe August (7) ya jahpawt hkying (9:30) daram hta KIA, KPDF pawnghpawm hpyen hpung ni Shwegu Ginwang, Myo La mayan kaw hkap gap gasat ai lam nga ai re hte shiga lawnglam hkumtsup hpe naw matut sagawn nga ai lam shawnglam lit nga ai ni kaw na chye lu ai.
August Shata praw 7 ya shani hta sha Hpakant ginra Nam Maw mare Kadai Tawng kaw dap jung shara jahkrat nga ai Myen hpyen dap kaw mung Jahpawt hkying 5:40 am aten daram kaw nna Tinang Hpyen hpung ni hte PDF pawnghpawm hpyen mung ni Myen Hpyen gumshem dap ni hpe sa htim gasat ai kawn gasat poi byin ai hta hkying 8:00 am aten daram hta tinang hpyen hpung ni kawn hpyen arung arai ni hte hpyen dap hpe mung zing madu la lu ai sha n-ga hpyen dap hpe mung wan nat jahten kau ya ai lam hte August shata Praw 7 ya hkying 11:00 Am ten hta mung Se Zin lawu mahkarai kaw shara la nga ai sam hkyeng P.T Ts hpyen hpung ni hpeTinang Hpyen dap Dung 26 hpyen hpung ni kawn sa htim gasat ai hta mung awng padang dip la lu ai re lam seng ang ai salang ni shana wa ai kaw na chye lu ai.
Ya na zawn gasat poi byin ai shara ni gaw Myen Hpyen Gumshem Dap kawn mung shawa ni hpe sawk jep ai lam ni , ahkun hta sha ai lam ni galaw nna dip up sha nga ai shara re hte mung mare masha ni gaw yi sun hkauna galaw sha let shanu shingbyi nga ai re hpe mung na chye lu ai sha n-ga Myen hpyen gumshem dap kawn sum machyi ai lam ni law law nga sai majaw grau na sadi maja let hkawm sa ra na masa du nga sai lam seng ang ai salang ni tsun sadi jaw da ai sha n- ga Myen hpyen gumshem dap kawn sinat kaji kaba ni hte hkrup mara gap shadam ai lam ni galaw ai majaw Mungshawa ni grau na hkrit tsang nga ai re hte Hpakant Seng Tawng kaw dap jung shara jahkrat nga ai Myen hpyen gumshem dap ni kawn mung sinat kaba ni hkrup mara gap shadam ai lam nga ai hpe mung na chye lu ai.