Nam San mare makau grupyin hta July praw kaw nna hpyen majan bai byin hpang wa ai majaw kalang bai hpyen koi yen nga ai mare masha ni a matu ya aten nawku hpung kaw nna lakawn ai lam galaw nga ai raitim, ten na wa yang na matu garum ntum ni ra ahkyak nga ai lam na chye lu ai.
Ya aten Hpyen koi yen nga ai mare masha ni gaw Waimaw Jau Ginwang St Joseph nawku jawng wang hte Sama Ginwang Sasana Rung wang shara lahkawng kaw shanu machyu nga ai rai nna, hpyenyen htinggaw yawng (100) jan nga ai re lam hte jahkring jahkra a matu sha hkyen da ai majaw aten na na koi yen ra wa yang na matu ra ahkyak ai lam ni hpe Nam San Buga Hpung Magam Gun langai ya na zawn tsun ai.
Nam San Yang mare kaw bai wa nga ai mare masha ni gaw HPyenyen dabang kaw jahpan shaw nna wa nga ai ni malawng rai nna, nkau gaw jahpan nshaw ai sha yi sun dum nta wa jasan let nga ai ni nga nna hpan lahkawng hku bai wa nga ai mare re.Ya aten hpyen koi yen nga ai mare masha ni gaw Hpyenyen Dabang kaw na Jahpan shaw da ai ni re hpe mung chye lu ai.
July praw (3) kaw nna Ya aten du hkra Nam San Yang hte makau grupyin shara ni hta shani shagu ngu na gasat gala byin nga ai majaw mare buga de bai wa lu na matu grau nna aten galu yak hkak wa na hpe mung mare masha ni myit tsang nga ma ai re.