Danai ginra kaw n-dai laman hta sha gunrai manu ni grai rawt wa ai majaw ginra mungshawa ni, maw ginra hkan ja gumhpraw tam ai ni grai yakhkak hkrum nga ai lam ginra masha ni tsun ai.
Ya aten Danai ginra hta N-gu hte kaga lu sha sau shakau ni, jak sau ni lani hte lani rawt wa ding yang re majaw grai yakhkak ai masa kaw du nga ai rai nna Lai wa sai shaning lanam aten ladaw hta gaw N-gu buri mi kaw Myen gumhpraw (60,000) kawn (70,000) daram nga ai raitim dai ning gaw (130,000)du wa ai hte Datsi, Desel Pepa mi hta mung (600,000) kawn dai ning (1,300,000) rawt tsaw wa ai lam matut nna mung n-gu manu jak sau manu ni naw rawt wa na masa nga ai majaw grau yakhkak wa na masa nga ai nga nna ginra masha ni tsun nga ma ai re.
Sumbwi Yang ginwang, Makaw ginwangdaw, Lamung ninghtawn kata Lamung mare hte Pinrang mare kata hta mung July (10) ya shani Datsi, Desel Galan (1) mi kaw Myen gumhpraw (40,000) du rawt wa sai nga nna ginra masha ni tsun ai.
Hpa majaw ya na zawn lu sha gunrai hte jak sau manu ni laja lana tsaw jat wa ai ngu hpe tup hkrak nchye lu ai raitim Myen hpyen gumshem dap kawn lu sha hte sau htaw shalai ai Modo ni hpe hkum pat kau ya ai aten shata mi daram na wa ai majaw rai na masa nga ai nga nna mungshawa nkau tsun maram da ma ai re.