Kamaing Byuha kawng kaw dung ai Myen hpyen gumshem dap kawn June (4) ya shana hkying (9:00) Pm aten daram kawn hpang nhtawm makau grup yin de laknak hkrup mara bai gap shadam ai majaw ginra masha ni hkrit tsang nga ma ai lam sagawn chye lu ai.
Dai myen hpyen gumshem dap ni gaw shana hkying (9:20) aten daram du hkra Nam Si En mare a hka hku maga hte Lawa mare lam maga de laknak kaba ni matut manoi gap bang ai lam nga ai sha n-ga hkying (9:30) chyen aten daram kaw nna gaw sinat kaji ni bai matut gap shangoi ai lam nga ai lam ginra masha ni tsun ai kaw na chye lu ai.
Gasat poi byin ai lam n nga ai raitim mare makau de laknak hkrup mara gap shadam ai majaw, mare kata laknak kaba si ni wa hkrat kapaw na hpe mungmasha ni hkrit tsang nga ma ai re.
Byuha kawng kaw dung ai dai Myen hpyen gumshem dap hpung ni gaw lai wa sai ten hkan mung makau grup yin de laknak hkrup mara gap shadam ai lam ni jahkringhkring galaw ai lam nga ai sha n-ga P.T.Ts hpyen hpung ni hte pawnghpawm la nhtawm Kamaing myo kata na lam mazup ni hkan shara jahkrat nna lai wa, lai sa mungmasha ni hpe laja lana sawk jep ai lam ni mung galaw nga ai re.