Sammung dingdung daw ဆီဆိုင် ginra na hpyen yen mungshawa ni n-gu malu masha hte tsi mawan yakhkak dut dang nga ai lam hpyen yen mungshawa ni kaw na chye lu ai.
Ndai hpyen yen mungshawa ni gaw lai wa sai April shata kaw nna n-gu malu masha garum ntum n lu mat ai majaw ya aten shadu lu shadu sha na matu pyi n lu mat ai dinghku ni nga ai lam na chye lu ai.
May shata (7) ya shani hpyen yen mungshawa ni hpe garum jaw lu na matu sa wa ai garum ntum maw daw hpe gara laknang lang uphung ni re n chye ai hpyen phung ni hkap gap ai majaw garum ntum ni nlu sa du garum mat ai re, hpyen yen mungshawa ni mai byin ai ladat hte ni nawn ai hkan na tam lu tam sha nna lu ai n-gu ni hpe sharam nhtawm hpa shadu sha ai ladat hte shani shagu lai di nga ra ai hpe mung chye lu ai.
Yinam aten ladaw re majaw machyi makaw ali awaw byin ai ni mung grai law ai raitim tsi mawan ni mung n lu mat ai sha n-ga asak kaba sai gumgai dingla ni, ma kaji ni hte ma hkum kanu ni a matu n gun rawng malu masha ni ra kadawn nga ai lam chye lu ai.
Jawng lung aten mung du wa, ja gumhpraw mayak nga ai hte hkrun lam mayak amyu myu a majaw jawnglung laika hpaji sharin ai lam n lu galaw ai jawngma ni grai law nga ai hpe mung chye lu ai.