Myen hpyen gumshem dap ni kawn lai wa sai 2022 shaning htum wa maga kaw nna Mungdan kata nga ai hpyen yen dabang yawng hpe dawm kau na matu tsun shadut nga ai re sha n-ga dai ning 2023 shaning hta mung hpyen yen dabang ni hta kadai mung n nga lu na ngu jahkring hkring tsun shadut wa ai majaw hpyen yen dabang nkau ni tinang buga ginra de wa nga magang sai raitim dabang law malawng gaw mayak manghkang amyu myu a majaw naw nga taw ra ai lam hpyen yen mung masha ni tsun ai kaw na chye lu ai.
Ya aten Myen hpyen gumshem dap ni hpyen yen dabang kata kaw nna lawan htawt sit na matu atik anang tsun shadut wa ai majaw nkau ni tinang mare buga de wa nga sai raitim, nkau ni gaw mare de shim lam n nga ai majaw tiang shimlum dum ai shara ni hkan htingbut htingra hkoi shap nna muga ginsum gap rai mai byin ai hku nga taw ai re hte Mungmyit Sinli Ga Kuthkai, Munggu ginra ni hkan na hpyen yen htinggaw (100) jan gaw mare buga de wa mung n mai, gara de htaw sit nga na re mung nchye rai hpyen yen dabang kaw sha naw machyu nga ra ai re hpe na chye lu ai.
Hpyen yen dabang ni hkan naw ngam taw ai hpyen yen mung masha ni hpe shinggyim garum ningtum hpung ni garum ningtum lam nlun jaw hkra Myen hpyen gumshem Asuya gaw ladat amyu myu hte pat shingdang ai lam ni galaw nga ai sha n-ga Dabang kaw nna lawan pru mat wa na matu jahkring hhking sa tsun shadut ai hte tinang mare buga de lawn n wa yang mare wan nat jahten kau ya na ngu ai du hkra tsun jahkrit shama ai re hpe na chye lu ai.
Mare makau grup yin hkan Hkam bawm jasan jaseng kau ya ai lam n nga ai, tinang dum nta wang hta lai kaga de pru hkawm ai lam, yi/sun galaw sha ai lam ni hpa mung n mai galaw ai sha n-ga mihprap wan nlu, hka nlu, laika sharin jawng n nga, tsi rung tsi jaw gawk ni mung n nga re ai kaw kalang lata wa nga ai gaw grai yak hkak ai, mare kata nga taw tim asak shim lam n nga ai majaw mare buga de n-gwi wa shi ai re nga nna Kuthkai hpyenyen dabang na hpyen yen mung masha langai tsun dan ai re.
Myen Hpyen Gusmshem Dap ni gaw lai wa sai 2022 November shata laman kaw nna Mungdan kata nga ai hpyen yen dabang ni yawng hpe dawm kau na matu hpyen yen dabang shagu de laika pa hkan sa ai lam, n-gup aga hte hkan tsun hkawm ai lam ni galaw ai re sha n-ga Dai ning March shata htum du hkra Mare buga de n wa nna hpyen yen dabang kaw sha naw nga taw ai ni hpe shanhte hpyen dap ni nan hkan htaw sa kau na ngu mung tsun shadut da ai lam nga ai re.