Sammung Dingdung Daw Muse ginra nga mung mare masha ni a dum nta hkan TNLA hpyen hpung ni (အိမ်ခွန်) ngu ai ga baw hte gumhpraw atik anang hkan hta sha nga ai lam ginra masha ni kaw na chye lu ai.
TNLA hpyen hpung ni kawn, galaw nga dingyang naw rai nga ai nta htap mi kaw myen gumhpraw Kyats 100,000 (Sen Mi), Htap lahkawng kaw Myen gumhpraw kyats 200,000 (Sen Lahkawng) jan, htap lahkawng jan re ai nta hpe gaw kyats 500,000 (Sen Manga) ngu masat hpyi ai ai sha n-ga mawdaw lu ai ni hpe mung, mawdaw langai kaw Myen gumhpraw Kyats 100,000 (Sen Mi) hpyi ai nga nna mare masha ni kaw na chye lu ai.
Muse ginra kaw TNLA hpyen hpung ni hku nna mung mare masha ni hpe ga baw lam myu myu tam nna gumhpraw hpyi sha nga ai hta, SSPP hpyen hpung ni mung lai wa sai May (18) ya shani kaw nna Muse ginra Hu Paw (ဟူပေါ) mare kaw nta kaba htap langai mi kaw myen gumhpraw kyats 1,000,000 ( Sen Shi), htap lahkawng kaw Kyats 2,000,000 (Sen Hkun) masat nna hpyi sha lai wa sai hpe matut tsun ai kaw na chye lu ai .
Muse ginra kaw TNLA hpyen hpung ni hte SSPP hpyen hpung ni, ya na zawn ga baw amyu myu shaw nna gumhpraw hpyi sha nga ai hta sha n-ga mara kata mung mare masha ni hpe jep chyoi, rim woi mat ai lam ni jahkring hkring galaw nga ai hpe mung chye lu ai.