Mungmyit sinlin ginra, Nam Gat mare kaw nna Myen Hpyen Gumshem dap Hk.L.Y (241) hpyen hpung ni rim woi mat ai Mung masha marai (3) May (22) ya shana daw hking (5:00) aten daram hta bai lawt pru wa sai lam na chye lu ai.
Myen hpyen gumshem dap Hk.L.Y (241) na hpyen hpung ni gaw lai wa sai May shata (20) ya shani Hpung Sara Lahkum Lahpai Zau Hpang, Hpauyam Gam Awng, Hkangda Mung San ni hpe Nam Gat mare kawn rim woi mat wa ai rai nna rim woi hkrum ai ni hpe bai dat ya na matu Mare Kanu Kawa ni hte ginra makawp maga hpyen hpung na salang ni sa tsun hkam la ai majaw lawt pru wa sai raitim ra ai aten hta bai shaga wa na ngu Myen hpyen gumshem dap ni tsun da ai lam ginra masha ni shana wa ai kaw na chye lu ai.
Mungmasha marai masum hpe hpa majaw ya na zawn rim woi mat ai lam tup hkrak n chye lu shi ai hte Nam Gat mare de Myen hpyen gumshem dap ni du shang wa shagu manghkang tam, san jep shatsang ai lam ni dingyang galaw ai majaw ginra Mung mare masha ni hkrit tsang let sha shangu nga ra ai lam na chye lu ai.
Myen hpyen gumshem dap ni Mung shawa Asuya daru magam ahkang aya zing madu la kau ai hpang, Rawt malan wuhpung wuhpawng law ai Mungmyit sinli ginra hta Mung shawa ni shimlum lam n nga grau nna hkit tsang maja let sha nga ra ai lam shisawk Galang tang madun da ai.