Sinna Ginwang Ginjaw, Sumbwi Yang Ginwang, KIA Masat (45) Dap Dung kaw la ru hpyen hkrum ai majaw nga shara dum nta nkau hten hkrum mat ai lam nga ai.
Lai wa sai May (20) ya shana aten laru hte marang kaba laja lana htu sawng wa ai hta Wun Dan gawk nu hte hpawn magam dap kata na nga shara dum nta hte shat gawk nkau hpri tsut hte dum nta shakum ni yawng malawng nna hten za hkrum mat ai re lam ginra masha langai tsun ai.
Ya aten lanam aten ladaw du wa sai hte maren nga shara yakhkak wa nna la ru hpyen a majaw nga shara dum nta hten hkrum mat ai shat gawk dum nta ni hpe bai gram sharia gaw gap nga sai lam mung chye lu ai.
Lai wa sai May (5) ya shani hta mung Danai Muklum kata kaw Nbung laru hte marang kaba htu sawng ai majaw mungmasha nga dum nta (20) daram hte shana gap na gat seng ni hpri tsut malawng hten hkrum mat ai sha n-ga lai lam ntsa hkan hpun kaba ni daw pat mat ai lam, Wan shadaw nkau daw hten mat ai lam ni byin lai wa sai re lam chye lu ai.