Hpakant lam Nam Ya Myen hpyen gumshem dap hte P.T.Ts ni a pawnghpawm shagyit kaw May (11) ya shana de hkying (3:30) Pm aten daram hta shagyit shawng hku lai wa ai mungshawa marai (3) rim hkrum ai lam sagawn chye lu ai.
Rim woi da hkrum ai ni gaw Hpakant lam, Senghpra mare na Slg. Ru Seng asak (30) grup yin, Slg. Lahpai San Nan asak (30) ning, hte Slg. N Pop Hka ni rai nna Nam Ya mare de sengke langai kaw chyawm jawn let sa nna shana de bai nhtang wa ai kaw Myen hpyen dap ni a shagyit lai, lup wa kawng makau du ai hte sinat hkan gap jahkrit nna rim woi mat ai re lam ginra masha ni tsun ai.
Rim woi da hkrum ai Slg marai (3) hpe hpa majaw rim da ai ngu lawng lam tup hkrak nchye lu ai raitim shanhte masum gaw Hpakant de lung wa ai Landcruser Modo langai hpe hkap jahkring nna san jep ai hpe shagyit kaw dung ai Myen hpyen gumshem dap ni mu chye nna ntsen nhten ai majaw n-gun (10) jan hte hkan shachyut rim la nna adup abyen san jep ai lam galaw wa ai lam rai na re nga nna hpyen dap hte ni kahtep ai ni tsun garu nga ma ai re.
Dai Slg marai masum rim woi da hkrum ai hte seng nna dum nta masha ni, mare uphkang salang ni, mare kanu kawa ni kawn hpyen dap de na lit nga salang ni hpe bai dat ya na matu tsun san jahkrup yu yang Myen hpyen dap maga na gaw masha kadai hpe rim woi da ai lam nnga ai nga nna sha bai htang dat ai lam nga ai majaw dum nta masha ni grai myit tsang nga ma ai lam na chye lu ai.
Dai shagyit hta sha lai wa sai March shata mung shagyit shawng hku sengke hte lai wa ai Senghpra mare na salang langai hte Hkrai Run mare na salang langai hkap rim jep adup abyen hkrum ai lam nga sai re hte ya aten du hkra hpa shi ga nna mat mat ai lam ni nga ai majaw ya aten hpyen majan mung hkrit tsang ra ai Hpakant lam mayan mare kahtawng hkan na mung mare masha ni gaw pru hkawm sa na matu mung grai hkrit tsang maja let sha nga ra ai lam matut na chye lu ai.