KIA Masat (6) Dap Ba ginra Dima makau na Ja Maw kaw TNLA hpyen hpung gumhpraw sa hpyi shagyeng hkawm ai hta masha n-kau ni hpe mung rim woi mat ai lam Jahtu masha ni kaw na chye lu ai.
KIO kawn tara shang ahkaw ahkang jaw da ai hta ja htu nga ai kaw May (9) ya shani TNLA hpyen hpung ni sa wa nna Mungmasha marai (5) hpe rim woi mat hte Ja htu nga ai ni a arung arai, Cycle, Modo, malu masha ni kaw na hkawt la mat wa ya ai lam ginra masha ni tsun ai kaw na chye lu ai.
TNLA ni kaw nna Ja htu hkawn kang manu Sen Mun mi hpyi wa ai hpe Ja htu ai labau ni hku nna bungli n lu shang ai aten law ai majaw kawnkawng manu shayawm ya na matu sa tsun jahkrup ai aten TNLA hpyen hpung ni Ja Maw kata de hpyen hpung hte chyinglau wa ai re, ndai mabyin mahkang hte seng nna KIO hku nna gaw shada manghkang n byin hkra hparan mayu ai lam nga ai hpe tsun da ai re.
Lahta Sammung ginra hta laknak lang ai hpungnau rawt malan hpung law law nga ai re majaw ja htu sha nga ai mungshawa ni galaw lu galaw sha ai hta jaw bang ra ai law nna yakhkak lam law law byin hkrum nga ai hpe mung matut chye lu ai.