Wunpawng Amyu Sha Kani Nanghpam Pat Jasan Jum Hpajang Komiti kaw nna April (25) ya shani ang ai, Kachin Anti Drug Day (D.Day) masat n’htoi hte seng ai ndau laika hpe ginra shagu de shabra jaw ai lam mu chye lu ai.
N-dau laika hta Wunpawng Amyusha Kani nanghpam pat jasan masing, jum hpajang komiti gaw, Wunpawng amyusha ni hte Wunpawng Mungdan sha ni hpe Kani nanghpam tsin yam kaw na gara hku makawp maga na, gara hku shalawt na ngu ai hpe aten hpring myit nchyan shaw let zai ladat amyu myu hte woi galaw nga ai re.
Pat jasan magam bungli hpe 2020-2021 lahkawng ning jan, Covid-19 ana hte Myen mung kata hpyen masa shuk shanut ai majaw gan hkring ra mat ga ai, Myu mare kaba ni hta, Tara Upade ka-up ai lam n nga ai re majaw, kani nanghpam lu sha jai lang ai lam, n dut n dang wanglu wanglang lu sha jai lang nga ai zawn, shanglawt uphkang ginra ni hta mung kani nanghpam htu shadut bang wa ai hta kani nanghpam lu sha ai masha mung lani hte lani grau law jat wa ai.
Dai majaw Jum hpajang komiti gaw pat jasan bungli bai galaw wa lu hkra, 2022 ning kaw nna manhkrum bawngban la ai hku nna mung, zoom meeting galaw nna mung, zai ladat nnan, bungli masing ningnan ni hpe masat jahkrat dat sai lam n dau shabra laika hta lawm ai re.
Jum hpajang komiti kaw nna masat jahkrat da sai Pat jasan bungli masing hpe 2023-2025 ning du hkra masum ning laman masan sa awngdang hkra, pat jasan magam gun ni yawng hte Magam Dap magam gun ni, Myu Shayi ni, Mungshawa ni yawng ang wa ai bungli hta n hkrit ntsang marau grang grang pat jasan magam lit gunhpai ra na re lam mung n dau da ai lam nga ai re.
Daini na D.Day masat n’htoi hta Jinghpaw mung hte Mungmyit sinli ga Ginra kata na pat jasan komiti ni mung tinang a ginra kata lu rim zingda ai kani lusha arung arai ni hpe mungshawa ni a man hta wan nat jahten kau ai lam galaw ai hpe mung chye lu ai.