Hpakant, Seng Tawng Shwe Myanmar Sau seng lam maw kaba kaw April (24) ya jahpawt hking 5:30 aten daram hta mungmasha marai (2) gap sat hkrum ai lam chye lu ai.
Gap sat hkrum ai yan gaw Awng Kyaw Myint asak (30) ning hte shi manang rai nna, kadai gara kaw na re n chye ai, jinghku jingyu ni hpe san sagawn ya na mung n chye ai majaw, moi mang hpe Hpakant mungshawa tsi rung ni hku nna lit la makoi mayang kau ya sai lam chye lu ai.
April (23) ya jahpawt maga hta mung, Hpakant Seng Tawng Happy KTV kaw kadai gara uhpung ni re n chye ai laknak lang hpung ni, mungmasha marai ( 4 ) hte Myen hpyen gumshem dap, hpyen Du Kaba langai hpe shang gap ai hta marai (5) asak si sum mat ai lam byin lai wa sai re.
Myen Hpyen gumshem dap, hpyen Du Kaba langai gap sat hkrum ai mabyin a majaw, shanhte n tsen n hten dum ai mungmasha ni hpe rim woi nna gap sat ai lam, mare de laknak kaba gap bang ai lam galaw nga ai hpe mung matut sagawn chye lu ai.