Wunpawng Mungdan Shanglawt Hpyen Dap KIA Masat (2) Dap Ba, Masat (45) Dap Dung, Sumbwi Yang Ginwang kaw Ninggawn Mungmasa Sharin Hkaja hpawng woi galaw ai lam nga ai.
N-dai sharin wunkat hpe April (21) ya shani hpaw hpawng lamang galaw nna sharin hpang wa ai rai nna April (25) ya shani du hkra galaw sa wa na re hte Sinna Ginwang Ginjaw Ningtau Uphkang Du, Salang Kaba Sabaw La Zau kawn sa du sharin ya ai lam chye lu ai.
Sumbwi Yang Ginwang kata nga ai Wunpawng ramma ni hte ginra kata rau nga ai hpu nau Lisu hte Naga amyu sha ni KIO a masa lam yan hpe chye na hkawn hkrang wa lu na matu madung yaw shada let hpaw sharin ai re lam Sumbwi Yang Ginwang Pati Komiti Shingtau Tingnyang Up, Wunkat Shabyin Shatai Komiti, Salang Kaba Jangmaw Tu Nan tsun ai.
N-dai sharin wunkat hta Ninggawn Mungmasa lam yan, Gaw Da tara, Rawt Malan labau hte ramma ni law malawng shang lawm ai re majaw Ka-ni Nanghpam pat jasan lam ni hpe mung ningmu jahpaw sai re hpe chye lu ai.
N-dai Ninggawn Mungmasa Sharin Wunkat hta Sumbwi Yang Ginwang Daw hte Makaw Ginwang Daw kata na hpung shang salang ni, Ginwang Amyu Shayi ni, Ginwang Daw Hkumra salang ni hte Magam dap kata na magam gun ni, mare buga de na Hpu nau Lisu hte Naga mungshawa ni marai (100) jan sa du sharin hkaja nga ai lam chye lu ai.