Myen Hpyen Gumshem Dap ni Hpakant Maden Yang mare kaw April (21) ya jahpawt du shang wa ai kaw mare masha ni hpe jahkrit shama rai nhtawm mazut ai ladat hte mare masha marai (50) jan hpe rim woi mat ai lam na chye lu ai.
Mare masha ni hpe adup abyen san jep ai lam galaw nhtawm Sak Ram daw law malawng ni hpe lam jasan hku nna rim woi mat ai sha n-ga mare kata na dum nta nkau hpe mung wan nat jahten kau da ai lam nga ai re.
Dai Myen hpyen dap ni gaw Mazup Yang kawn pru wa ai Hk.M.Y (11) kata na hpyen hpung ni rai nna, lam jasan hku nna rim woi mat ai Maden Yang mare masha ni hpe woi let shana daw hta Ginsi maga de bai du shang nga sai lam chye lu ai.
Hpakant Byuha Kawng kaw nna mung Maden yang mare maga de Laknak kaba ni hkrup mara gap nga ai majaw mare masha ni hkrit kajawng nga ai lam hpe mung na chye lu ai.