Myen hpyen gumshem ni mare de nbungli hte dingsa gasat ai kaw masha marai (100) jan asak si sum.

Sagaing ginra Kanbalun Myo, Pazi mare kaw Apirl (11) jahpawt hkying (7:00) aten daram hta Ginra mungshawa makawp maga hpung ni rung hpaw lamang galaw nga ai kaw Myen hpyen gumshem dap ni nbung hte htim gasat ai majaw mara kata mungmasha ni hte Ginra Mungshawa makap maga hpung ni marai (100) daram, ma ni naw kaji ai marai (18) daram asak si sum mat ai lam nga ai re.

Myen hpyen gumshem dap a Jet Fighter nbungli hte kalang, MI 35 Helicopter nbungli hte masum lang bawm wa jahkrat gasat ai majaw dai lamang hta shanglawm ai ni, makau grup yin hkan nga ai ni marai (100) jan asak si sum mat ai lam nga ai rai nna, hkala hkrum ai masha marai kade nga ai gaw tuphkrak n chye lu shi ai re.

Myen hpyen gumshem dap ni gaw lai wa sai 2022 ning Oct 23 ya shana aten hta Jinghpaw Mung Hpakant Anang Pa mare kaw KIO masat nhtoi hpe hkap tau lamang galaw ai hta bawm wa jahkrat bun ai majaw magam gun ni hte mungshawa yawng marai 70 jan asak si sum ai lam mung byin lai wa sai re.

Myen hpyen gumshem dap mungshawa nga ai mare de nbungli hku nna htim gasat ai hta dai ni na Sagaing ginra hta byin ai gaw sawng dik ai re lam mung chye lu ai.