KIA Masat (3) Dap Ba, Masat (12) Dap Dung, Shwegu Ginwang kata Myen Hpyen Gumshem Dap ni hte KIA, KPDF pawng hpawm hpyen hpung ni lai wa sai March (23) ya shani kaw nna shani shgu ngu na gasat gala byin ai hta Myen hpyen gumshem dap ni nbungli bawm wa jahkrat ai majaw wan hkut, mahkup sai wan ni grai mawng wa ai kaw na mare masha ni hta jahkru, kashung gari rai, shawoi hkan na machyi hpan hte nbung ai machyi makaw byin hkrum nga ai lam chye lu ai.
Myen hpyen gusmehm dap ni nbungli hte jahkrat ai bawm ni gaw mung mare masha ni hpe hkra machyi shangun wa mai ai baw gung hpan lawm ai n lawm ai ngu tup hkrak n lu tsun shi ai raitim mare masha ni kaw machyi byin hkrum nga ai ana kumla mahtai hpe matut jep sagawn nga ai nga nna ginra masha ni tsun ai kaw na chye lu ai.
Gasat gala byin ai aten laman, Man Win, Si Mu Ji hte Si Mu Le mare ni hpe wan nat jahten ai lam galaw ai hta mung mare masha dum n ta (1000) jan wan hkru lawm mat ai hte Mung mare masha ni a yi sun, du sat yam nga ni mung wan hkru lawm mat ai lam nga ai zawn gsat gala byin nga ai lapran mung mare masha ni asak si sum lawm mat ai lam mung nga sai re, mare kata de n bungli bawm, laknak kaba ni hte gap bun ai majaw mare kahtawng (11) kaw na mung mare masha ni hpyen koi yen ra mat ai lam chye lu ai.
Mare masha nkau dum nta kaw nmai nga wa ai majaw, gara de hprawng koi yen ra na mung n chye rai, nta htinggaw (100) daram mare makau hkan naw chyat rawng nga ai lam chye lu ai, ndai hpyen yen mung masha ni hpe lit nga ai ni kaw nna dangdi dangdep ai made garum madi shadaw ya nga ai re hte kaga garum ningtum jaw ai wuhpung wuhpawng ni kaw nna gaw ya ten du hkra matut mahkai wa ai lam n nga shi ai sha n-ga majan naw byin nga ai shara re majaw sadu garum jaw ai wuhpung wuhpwng ni n nga shi ai re nga nna mung matu tsun ai re.
KIA Masat (3) Dap Ba, Masat (12) Dap Dung, Shwegu Ginwang kata mare kahtawng shara ni hta ya ten Myen hpyen gumshem Dap ni dap jung shara jahkrat nga taw ai rai nna Myen hpyen gumshem hpyen hpung ni htingnut wa mat ai lam garai n nga shi ai majaw majan naw matut byin wa na masa nga ai nga nna shawng lam hta tatut lit la woi awn nga ai salang ni tsun ai kaw na chye lu ai.