KIA Masat (3) Dap Ba, Masat (12) Dap Dung ginra, Shwegu ginwang, အထွက်တွင်းဝ ngu ai shara kaw March (23) ya jahpawt hkying (8:30) aten daram hta Myen hpyen gumshem dap hte KIA pawnghpawm hpyen hpung ni gasat poi byin ai lam nga ai.
Myen hpyen gumshem dap Hk.M.Y (602), Hk.L.Y (10,77) pawnghpawm n-gun (130) jan hpung ni gaw Shwegu kaw nna uhpung masum garan nhtawm hpyen shamu shamawt chyinglau hkawm ai kaw KIA hte KPDF pawnghpawm hpung ni hkap shingla gap gasat ai kawn gasat poi byin wa ai re lam shawnglam shiga kaw na chye lu ai.
Ya aten Myen hpyen gumshem dap hpyen hpung ni gaw gasat poi byin ai grup yin hkan naw shamu shamawt hkawm nga ai rai nna hpyen masa shaja hkat nga ding yang naw re lam chye lu ai.
Sagaing jarit Indaw ginra mayan hkan mung n-dai laman gasat poi ding yang byin ai lam nga ai hta March (22) ya shani mung Indaw kaw na sa wa Myen hpyen gumshem dap Modo lahkawng hpe KPDF hpyen hpung ni Khatar kaw bawm hkap kapaw gasat ai lam nga sai re.
Dai gasat gala hta Myen hpyen gumshem dap maga na hka hkala si sum lam nga ai majaw mare kata shang nna mungshawa dum nta masum wan nat jahten kau da ya ai lam ni mung nga sai lam na chye lu ai.