KIO Asuya Ginjaw Hpaji Dap kaw nna 2022-2023 Hpaji Ladaw Tsang Shi San Poi san jep ai hpe March (15) ya shani du hkra angwi apyaw shangut la lu sai hte shang htai ai jawngma yawng gaw marai (2700) jan nga ai lam Ginjaw hpaji dap kaw na chye lu .
San Poi shang htai na matu shawk shawn da ai jawngma ni yawng gaw marai (2749) nga ai hta na marai (15) gaw lam amyu myu a majaw san poi hpe ngut kre hkra nlu shang htai mat ai lam nga ai rai nna, ngut kre ai aten du hkra shang htai ai jawngma yawng gaw marai (2734) re lam Ginjaw Hpaji Dap amu madu Srkb Marip Naw Htoi tsun ai.
San Poi san jep ai lam hpe lai wa sai March (8) kaw nna March (15) shani du hkra KIO Asuya uphkang ginra kata hpaw tawn ai Lahta Tsang hpaji jawng san poi san jep ginra jawng shagu hta rau san jep ai lam hpe galaw ai re.
Lai wa sai jawng lung ladaw hta gaw KIO Asuya a Tsang Shi San poi htai ai jawngma yawng marai (2188) nga ai rai nna awng pru jawngma marai (1680) re lam hte, dawnjan ningtawn jawngma gaw marai (308) , Awng pru tsa hta shadang (76%) nga ai re hpe mung chye lu ai.