Putao-Sunpra Bum lam mayan kaw KIA hte Myen hpyen gumshem dap hpung ni numdaw masum lang gasat poi byin

KIA Masat (1) Dap Ba, Masat (10) Dap Dung ginra, Mai Htawng mare lawu Lawng Hkang bum mayan kaw March (14) ya jahpawt hkying (9:45) aten Myen hpyen gumshem dap hte KIA hpyen hpung ni gasat poi byin ai lam nga ai.

Myen hpyen gumshem dap n-gun (80) grup yin lawm ai hpyen hpung ni gaw Putao-Sumpra bum lam ding yang hkan nna hpyen shamu shamawt chying lau hkawm ai hta Mai Htawng mare hku lai yu wa ai kaw KIA hpyen hpung ni hkap shingla gap gasat nna gasat poi byin wa ai re lam shawng lam lit nga salang ni tsun shana wa ai.

Dai hpang hkying (10:15) aten hta Kawa Pang makau kaw mung KIA Masat (22) Dap Dung ginra Sup Hka maga de na shamu shamawt yu wa ai Myen hpyen gumshem dap hpung ni hte KIA hpyen hpung ni numdaw kalang bai gasat poi byin ai lam nga nna shana maga hkying (2:00) aten Daru Yang maga na lung wa ai Myen hpyen gumshem dap hpyen hpung ni hte mung KIA hpyen hpung ni gasat poi matut byin nga ai lam sagawn chye lu ai.

Ya aten dai ginra hta Myen hpyen gumshem dap ni hpyen n-gun (200) jan uhpung masum hku garan nna shamu shamawt nga taw ai rai nna gasat poi byin ai grup yin hkan sha naw shamu shamawt nga taw ai re majaw gasat poi naw matut byin wa mai ai lam lit nga salang ni maram da ma ai.

Dai ginra hta Lai wa sai March (9) ya shani Myitkyina kawn Modo (4) hte hpyen n-gun (70) jan, hpyen lang rung rai, malu masha ni htaw let n-gun jat jahpring ai lam ni galaw wa ai hpang kaw nna KIA hpyen hpung ni hte matut manoi gasat poi byin nga ai re hpe chye lu ai.