Hpakant ginra kaw ndai laman Myen hpyen gumshem dap kawn mara kata mungmare masha hpe rim woi mat ai lam matut manoi galaw nga ai hta March (11) ya shani mung Hpapin mare kaw mungmasha marai (4) hpe rim woi mat ai lam sagawn chye lu ai.
Rim woi mat hkrum ai mungmare masha ni gaw Hpapin mare na htunghking rung kaw zuphpawng galaw na matu sa du nga ai aten Myen hpyen gumshem dap kawn 4 Wheel Modo, Pajero Modo ni hte kalang ta du shang wa nna sinat gap kapaw jahkrit nhtawm sa du dung nga ai ni hpe shang rim ai hta marai (2) lu hprawng lawt mat ai raitim mare masha marai (4) hpe lu rim woi mat ai lam chye lu ai.
Myen hpyen gumshem dap ni rim woi mat ai hta na marai langai gaw sinat pala hkra hkala hkrum ai lam nga ai re majaw rim woi hkrum mat ai ni hte seng nna dum nta masha ni mare masha ni grai myit tsang nga ma ai re hpe sagawn chye lu ai.
Myen hpyen gumshem dap kawn ya na zawn mare kata shang nna mungmare masha hpe kam ai hku rim woi da ai lam ni galaw nga ai majaw ginra masha ni hkawm sa hkawm wa galaw ai lam, zuhpawng galaw masha hpawng ai lam ni a matu pi hkrit tsang ra ai madang kaw du nga ai lam ginra masha ni tsun ai.