KIA Masat (1) Dap Ba, Masat (4) Dap Dung ginra, Marawng Zup makau kaw March (9) ya shana de hkying (4:30) aten Myen hpyen gumshem dap Modo hpung ni hpe KIA hpyen hpung ni bawm hkap kapaw gap gasat ai lam nga ai.
Myitkyina kawn Modo (4) hte hpyen n-gun (70) jan, hpyen lang rung rai, malu masha ni htaw let KIA hpyen hpung ni shara jahkrat nga ai gaiwang de shamu shamawt shang wa ai Myen hpyen gumshem dap Modo hpung ni hpe KIA hpyen hpung ni bawm shawng hkap kapaw nna sinat laknak kaji kaba hte bai htim gap gasat ai kawn gasat poi byin wa ai re hpe chye lu ai.
Dai aten hta sha KIA Masat (9) Dap Ba Masat (26) Dap Dung ginra, Chyawng Wa hte Na Mawn lapran Ka-la Kung mare makau hkauna pa kaw mung Chyawng Wa mare P.T.Ts shagyit kaw wa du shatup nga ai Myen hpyen gumshem dap HK.L.Y (42) n-gun (100) grup yin lawm ai hpung ni gaw 3 Ground Modo lahkawng hte အေရှ့ကန် sa wa lam hkan shamu shamawt chying lau wa ai kaw KIA pawnghpawm hpyen hpung ni hte ang katut nna gasat poi byin wa ai re hpe shawng lam shiga kaw na chye lu ai.
Ya na zawn Myen hpyen gumshem dap hte KIA hpyen hpung ni lapran gasat poi laja lana byin nga ai majaw March. (10) ya jahpawt jau hkying (1:00) Am aten kaw nna Tadar Oo kawn rawt wa ai Myen hpyen gumshem dap a Jet Nbungli lahkawng KIA Masat (9) Dap Ba hte Masat (6) Dap Dung lapran kaw Nbungli bawm wa jahkrat gasat ai lam nga nna masha hkra hkala hkrum ai lam nnga ai raitim nga shara dum nta nkau wan hkru hten za hkrum mat ai lam nga ai hpe sagawn chye lu ai.