Kamaing byuha kawng npu Hpara bum ဘုရားေတာင်makau kaw March. (9) ya shana de hkying (6:00) Pm aten mungmasha langai hkam bawm gabye kapaw hkrum nna asak si sum mat ai lam ginra masha ni tsun shana wa ai kaw na chye lu ai.
Hkam bawm gabye kapaw hkrum ai wa gaw Kamaing Lamawng kahtawng kaw nga ai Slg.Jangmaw Naw asak (38) ning rai nna mare makau Myen hpyen dap Byuha kawng npu mayan kaw Kawa sa kahtam ai hta Myen hpyen gumshem dap ni hkam tawn ai hkam bawm gabye kapaw la ai rai nna hkala ningma grai sawng ai majaw asak si sum mat ai lam sagawn chye lu ai.
Bawm kapaw manghkang byin ngut ai hpang Asak si sum mat ai Slg.Jangmaw Naw a moi mang hpe Kamaing byuha kawng kaw hta tawn da ai lam nga nna nta masha ni, mare uphkang slg ni, nawku hpung woi ni sa la na matu byuhamu wa March (10) ya shani hkying (11:30) aten shana wa ai lam nga ai majaw dum nta masha ni gaw moi mang hpe makoi mayang na matu hkyen lajang nga ai lam chye lu ai.
Kamaing Byuha kawng nga Myen hpyen gumshem dap ni gaw mare makau grup yin hkan sha hkam bawm hkam da ai majaw lai wa sai ten hkan mung yi sa yi wa ni, hkawm sa hkawm wa galaw ai ginra mungmasha ni hte Dum su, Nga ni hkam bawm gabye kapaw hkrum nna sak si sum ai lam, hkala hkrum ai lam ni jahkring hkring byin nga ai re hpe chye lu ai.