Htoi Gender and Development Foundation kaw nna woi awn let Mungkan Myu shayi masat n’htoi hpawng lamang hpe March (8) ya shani Laiza Muklum, Woi Chyai Hpyen Yen Dabang kaw galaw ai lam nga ai .
“Wunpawng amyu sha ni kaw mung amyu shayi ni lu ging lu mai ai a hkaw a hkang n lu ai lam grai naw nga ai, amyu shyi ni yawng dip da hkrum ai kaw nna lawt kawt wa lu na matu yaw shada let shaning shagu Mungkan a myu masat nhtoi hpe n bung ai ga baw hte galaw ai lam nga ai” nga nna Htoi Gender and Development Foundation director Srn.kaba N-Bau Nang Pu tsun ai.
“A myu shayi ngu ai ni gaw La ni hta dawn jan na myit shang sha ai lam ni nga ai, grau nna num ni kaw rawng ai atsam ningja rawng ai re, ndai nbung ai atsam ningja ni hpe rap shara ai hku nna wuhpung wuhpawng langai mi sha galaw nga yang nmai byin ai re, dai majaw Num shawa wuhpung wuhpawng yawng hte NGO, CSO ni, hpaji munu ni yawng jawm ta gindun myit hkrum let jawm galaw sa wa yang she ra kadawn nga ai lam ni hpe rap ra ai hku nna galaw lu na re” nga nna mung Srn. Kaba K. Roi Awng tsun ai.
Lamang hpe daw lahkawng garan nna galaw ai hta daw langai kaw kyuhpyi la ai lam, Mungkan myu shayi masat nhtoi byin wa ai labau tsun dan ai lam galaw nna, daw lahkawng hku na gaw Srn.kaba N-Bau Nang Pu, Srn.Kaba Hkawn Ja, Srn.Kaba Daw Hkyin Tsing Myint(ဒေါ်ခင်စန်းမြင့်) ni kaw nna a myu shayi num hte mungmsa ngu ai lam, Sut masa lam kata na myu shayi ni, ya ten na hta myu shayi ni a mayak ngu ai gabaw ni hpe (စကားဝိုင်း) bawngban jahkrup ai lam galaw ai re.
Daini galaw ai Mungkan myu shayi masat ninghtoi hpawng hta Magam Dap, Makant Dap de na saw shaga da ai amyu shayi ni, Laiza Muklum kata nga ai amyu shayi ni, NGO wupung wuhpawng shagu na amyu shayi ni Hpyen yen dabang na a myu shayi Num ni yawng marai (600) jan sa du shang lawm ai re.