KIA Masat (2) Dap Ba, Masat (11) Dap Dung ginra, Mali hka makau Tai Lum kaw March.1 ya shani hkying (10:00) aten daram kawn hpang nhtawm Myen hpyen gumshem dap hte KIA hpyen hpung ni gasat poi byin ai lam nga ai.
KIA hpyen hpung ni dap shara jahkrat nga ai shara de Myen hpyen gumshem dap hpung ni hpyen shamu shamawt chyinglau shang wa ai kaw KIA hpyen hpung ni hkap shingla gap gasat ai kawn Minutes (20) daram gasat poi byin wa ai rai nna gasat poi hta laknak kaba ni hte mung gap gasat hkat ai lam nga ai hpe shawng lam shiga kaw na chye lu ai.
Gasat poi zim mat ai hpang dai Myen hpyen gumshem dap hpung ni gaw bai matut shamu shamawt wa ai majaw shana daw maga gasat poi numdaw kalang bai byin ai lam nga ai hte shiga lawnglam hkum tsup hpe matut sagwn nga ding yang re.
Dai Myen hpyen gumshem dap ni dai ginra mayan hkan Febuary (28) ya shani kaw nna shamu shamawt wa ai majaw dai shana daw hkying (3:00) aten hta mung Mali Sut Yang lahta kaw KIA hpyen hpung ni bawm hkap kapaw gap gasat nna gasat poi byin ai lam nga sai re.
Ndai laman Myen hpyen gumshem dap ni hpyen shamu shamawt ai lam matut manoi galaw nga ai majaw KIA Masat (9) Dap Ba Hpakant ginra hte KIA Masat (6) Dap Ba Kuthkai ginra ni hkan mung Myen hpyen gumshem dap hte KIA hpyen hpung ni gasat poi matut manoi byin nga ai sha n-ga mara kata mungshawa ni rim woi da hkrum ai lam ni mung nga ai re hpe chye lu ai.