KIA Masat (6) Dap Ba, Masat (9) Dap Dung ginra, Kuthkai ginwang, Nawng Swi mare makau kaw Febuary (28) ya jahpawt hkying (9:30) aten daram hta Kuthkai de na lagaw lam hku n-gun (15) hte shamu shamawt lung wa ai Myen hpyen gumshem dap hpyen hpung hpe KIA hpyen hpung ni hkap shingla gap gasat nna gasat poi byin ai lam nga ai.
Gasat poi zim mat ai hpang dai Myen hpyen gumshem dap hpung ni gaw hpyen n-gun bai jat jahpring nga ai sha n-ga Nawng Swi mare kaw shara jahkrat nga nna makau grup yin de laknak kaba gap bang nga ai zawn Kuthkai Byuha kawng nga Myen hpyen gumshem dap ni mung gasat poi byin ai shara de laknak kaba ni gap bang ya ai lam chye lu ai.
Febuary (28) ya jahpawt hkying (5:20) Am aten hta sha KIA Masat (9) Dap Ba, Masat (6) Dap Dung ginra, Seng Ja Bum mare lung wa lam kaw mung ကျောက်စိန်းသစ်ရွက် maga kawn 4X4 Modo langai hte hpyen shamu shamawt lung wa ai Myen hpyen gumshem dap hpung ni hpe KIA hpyen hpung ni bawm hkap kapaw gasat ai lam chye lu ai.
Sharaw Hka mare hte Seng Ja Bum mare lapran Sabyi Hku mare chyinghka masat shadaw makau kaw Febuary (27) ya shana maga hkying (4:45) aten hta Myen hpyen gumshem dap ni shamu shamawt lai hkawm ai kaw KIA hpyen hpung ni bawm hkap kapaw gap gasat ai lam nga nna Bawm hte hkap shingla gasat ai hpang Myen hpyen gumshem dap maga na Sabyi Hku mare kata de shang wa nna asak naw ram ai la wangan ni, ramma ni mu mamu yawng hpe rim woi mat ai lam ni mung nga ai hpe sagawn chye lu ai.
Ya na zawn Hpakant ginra hta gasat gala byin nga ai hta mungmasha hpe mara kata rim woi da ai lam ni galaw nga ai majaw Hpakant ginra masha ni grai myit tsang nga ai hte rim woi da hkrum ai ni mung dum nta de garai ndu wa shi ai lam chye lu ai.