Hpakant, Lawnghkang ginra, Mazup Yang mare makau kaw Febuary (24) ya jahpawt hkying (8:30) aten Myenhpyen gumshem dap ni hpe KIA hpyen hpung ni sa gap gasat ai lam nga ai.
Mazup Yang htawng kaw sin ai Myen hpyen gumshem dap Hk.L.Y (76) hpung ni hpe shanhte nga ai hpyen dap wang kaw KIA hpyen hpung ni sa gap gasat ai lam rai nna Myen hpyen gumshem dap maga na mung makau grup yin de laknak kaba ni bai nhtang gap gasat ai lam chye lu ai.
Myen hpyen gumshem dap kawn laknak kaba gap dat ai hta Mazup Yang mare kaw laknak kaba si lahkawng wa hkrat kapaw ai lam nga nna Jan.Lahkri Ja An asak (24) ning laknak kaba si hkyep hkra hkala hkrum ai sha n-ga mungshawa dum nta lahkawng mung hten hkrum ai lam nga ai hpe chye lu ai.
Myen hpyen gumshem dap ni gap dat ai laknak kaba si hkyep hkra hkala hkrum ai amyu shayi kanu num jan gaw hkala la ai ningma grai sawng ai hte ya aten Lawnghkang tsi rung kaw tsi tsi hkam la nga ai lam sagawn chye lu ai.
Mazup Yang htawng kaw sin ai Myen hpyen gumshem dap ni gaw lai wa sai ten hkan mung makau grup yin de laknak kaba hkrup mara gap shadam ai lam ni jahkring hkring galaw ai lam nga ai majaw Mazup Yang mare, Sanghka mare kata hkan wa hkrat kapaw nna mungshawa asak si sum ai lam, dum nta hten hkrum ai lam ni mung byin lai wa sai re hpe chye lu ai.