KIA Masat (3) Dap Ba, Masat (27) Dap Dung ginra, Ulang Pa ginwang, Mung Hkawng lahta Laika Zu Ja makau kaw Febuary (21) ya jahpawt hkying (7:00) aten daram kaw nna Myen hpyen gumshem dap hte KIA hpyen hpung ni gasat poi matut byin ai lam nga ai.
KIA hpyen hpung ni shara jahkrat nga ai gaiwang de Myen hpyen gumshem dap Hk.L.Y 223, Hk.L.Y(236) pawng hpawm hpung ni htu shadut shamu shamawt shang wa ai majaw KIA pawnghpawm hpung ni hkap shingla gap gasat ai kawn gasat poi byin wa ai re hpe chye lu ai.
Dai ginra hta lai wa sai Febuary (17) ya shani kawn hpang nhtawm Myen hpyen gumshem dap ni hpyen n-gun jat jahpring let hpyen man law law hpaw nna shamu shamawt chying lau wa ai majaw Banggaw lawu Nammak Zup hte Hkrai Dun lapran, Mung Hkawng hte Hanhtet lapran ni hkan shani shagu ngu na daram KIA hpyen hpung ni hte gasat poi byin nga ai re hpe sagawn chye lu ai.
Dai Myen hpyen gumshem dap pawnghpawm hpung ni gaw ya aten du hkra raitim gasat poi byin ai ginra mayan hkan naw shamu shamawt nga ai hta hpyen masa shaja hkat nga ai masa naw re majaw gasat poi naw matut byin wa mai ai lam mung shawng lam lit nga salang ni maram da ma ai.
Mungmyit Sinli Ga, Kachin Sub-state, KIA Masat (6) Dap Ba ginra hkan mung n-dai laman Myen hpyen gumshem dap ni hpyen n-gun jat jahpring nna shamu shamawt nga ding yang re majaw KIA hpyen hpung ni hte gasat poi jahkring hkring naw byin nga ai re hpe mung matut chye lu ai.