KIA Masat (3) Dap Ba, Masat (27) Dap Dung ginra, Ulang Pa ginwang, Mung Hkawng lahta Laika Zu Ja makau kaw Febuary (19) ya shani Myen hpyen gumshem dap hte KIA hpyen hpung ni gasat poi byin ai lam nga ai.
Dai jahpawt manap hta Myen hpyen gumshem dap hpyen hpung ni kawn Manmaw Mung Hkawng lahta Laika Zup Ja maga de htu shadut shamu shamawt chying lau shang wa ai hta jahpawt hkying (8:00) aten KIA hpyen hpung ni bawm hkap kapaw gasat ai lam nga nna Myen hpyen gumshem dap hpung ni dai shara kawn bai matut shamu shamawt wa ai majaw shana maga hkying (2:20) aten daram kaw nna KIA hpyen hpung ni numdaw kalang bai hkap shingla gasat dat ai hpang lahkawng maga gasat poi matut byin wa ai re hpe chye lu ai.
Gasat poi hta Myen hpyen gumshem dap maga na hkra hkala si sum lam law ai majaw gasat poi zim mat ai hpang du hkra makau grup yin de laknak hkrup mara gap bang ai lam nga ai hpe mung sagawn chye lu ai.
KIA Masat (27) Dap Dung ginra hta lai wa sai Febuary (17) ya shani mung Myen hpyen gumshem dap ni hpyen shamu shamawt chying lau hkawm ai majaw Banggaw lawu Nammak Zup hte Hkrai Dun lapran kalang, Manmaw Mung Hkawng hte Hanhtet lapran Nat Gyi Sin kaw kalang numdaw lahkawng lang KIA hpyen hpung ni hte gasat poi laja lana byin sai re hpe mung sagawn chye lu ai.