Hpakant lam, Nam Ya mare kaw dap shara jahkrat nga ai Myen hpyen gumshem dap HK.M.Y (12) dap ni kawn Febuary (14) ya shani sengke hte lai wa sai mungmasha langai hpe rim jep adup zing ri da ai lam na chye lu ai.
Rim adup hkrum ai wa gaw Hpakant lam, Hkrai Run (တံတားညီေနာင်) mare na Slg.Thang Leng asak (50) ning rai nna dum nta kawn sengke hte Nam Ya mare de gat mari yu wa yang Myen hpyen gumshem dap hte P.T.Ts hpung ni a pawnghpawm shagyit shawng kaw shi hpe hkap jahkring da nna san jep nhtawm lagaw lata du adup abyen zingri da ai hpang hpyen dap kawng de woi mat ai lam nga ai hpe sagawn chye lu ai.
Slg.Thang Leng rim woi da hkrum ai majaw dum nta masha ni, mare masha ni nkau kawn hpyen dap de na lit nga ai ni hpe sa tsun jahkrup ai lam nga ai raitim dat ya ai lam garai nnga shi ai hpe chye lu ai.
Myen hpyen gumshem dap kawn hpa majaw ya na zawn mungshawa hpe adup abyen zing ri ai ngu hpe tup hkrak n chye lu ai raitim lai wa sai Febuary (11) ya shani Nam Ya mare kaw P.T.Ts hpyen la langai sinat gap gasat hkrum ai hpang kaw nna lai wa lai sa ni hpe laja lana grau sawk jep wa nhtawm ya na zawn galaw wa ai re hpe chye lu ai.