KIA Masat (6) Dap Ba, Masat (9) Dap Dung ginra, Kong Yen kawng makau kaw Febuary (15) ya shani jahpawt maga hkying (8:30) aten daram kawn hpang nhtawm Myen hpyen gumshem dap hte KIA hpyen hpung ni gasat poi bai matut byin ai lam nga ai.
Dai kawng mayan hta Febuary (14) ya shani kawn hpang nhtawm Myen hpyen gumshem dap ni hpyen n-gun jahpring nna KIA hpyen hpung ni dap shara jahkrat nga ai gaiwang de htu shadut shamu shamawt chyinglau shang wa ai majaw KIA hpyen hpung ni hkap shingla gap gasat ai kawn lahkawng maga gasat poi matut manoi byin wa ai re hte gasat poi hta laknak kaba ni hte mung shada gap gasat hkat ai lam nga ai hpe sagawn chye lu ai.
Gasat poi byin ai majaw shana maga de hkying (1:45) aten daram kawn hpang nhtawm Mandalay Tadar Oo kawn sa wa ai Myen hpyen gumshem dap a Jet Nbungli langai gasat poi byin ai shara hte makau grup yin hkan jak sinat hte gap gasat ai lam ni mung laja lana galaw nga ai re hpe sagawn chye lu ai.
Myen hpyen gumshem dap kawn gasat poi byin ai shara sha n-ga gasat poi byin ai lam nnga ai shara ni hkan du hkra Hpyen Nbungli ni jai lang nna bawm jahkrat gap gasat ai lam ni mung galaw nga ai re, KIA Masat (2) Dap Ba Masat (43) Dap Dung ginra Muk Lung bum kaw mung Febuary (14) ya shana hkying (10:50) aten Tadar Oo kawn lung wa ai Myen hpyen gumshem dap a Jet Nbungli langai bawm wa jahkrat bun ai lam nga ai hpe na chye lu ai.