KIA Masat (6) Dap Ba, Masat (9) Dap Dung ginra, Kayun kawng makau kaw Febuary (14) ya shani hkying (10:00) aten daram kawn hpang nhtawm Myen hpyen gumshem dap hte KIA hpyen hpung ni gasat poi byin ai lam nga ai.
Myen hpyen gumshem dap ni kawn hpyen n-gun jahpring nna KIA hpyen hpung ni dap shara jahkrat nga ai gaiwang de htu shadut shamu shamawt chyinglau wa ai majaw KIA hpyen hpung ni hkap shingla gap gasat ai kawn lahkawng maga gasat poi byin wa ai re hte shana de hkying (2:30) Pm aten daram du hkra laknak kaba gap nsen ni naw ngoi ai lam ni gasat poi hte ni kahtep ai ginra masha ni tsun ai.
Gasat poi laja lana byin nga ai majaw Mandalay Tadar Oo kawn sa wa ai Myen hpyen gumshem dap a Jet Nbungli langai mung shani hkying (11:40) aten kalang, hkying (12:00) aten kalang numdaw lahkawng lang bawm wa jahkrat gasat ai lam nga ai hpe sagawn chye lu ai.
Febuary (13) ya shana hkying (7:00) Pm aten hta mung KIA Masat (9) Dap Dung ginra, Nam Um Sau Seng kaw shara jahkrat nga ai Myen hpyen gumshem dap Tatma (99) hpung ni hpe KIA hpyen hpung ni sa htim gap gasat nna gasat poi byin ai lam nga sai re.
Dai shana hkying (6:00) aten hta mung KIA Masat (4) Dap Ba, Masat (8) Dap Dung, Namhpakka Myen hpyen gumshem dap Hk.L.Y (123) dap hpe KIA hpyen hpung ni Febuary (13) ya shana (6:00) aten laknak kaba hte sa htim gap gasat ai lam nga sai re hpe chye lu ai.