Kukang Laknak Lang Hpyen Hpung Ni Manje mare masha langai hpe adup abyen zing ri sat kau ai

Mungmyit Sinli ga ginra, Manje mare masha langai hpe Kukang Laknak Lang (MNDAA) hpyen hpung ni rim woi mat wa nna adup zingri sat kabai da ai lam nga ai hpe ginra masha ni kaw nna chye lu ai.

Lai wa sai November (22) ya shani MNDAA hpyen hpung ni gaw Manje mare kata kani-nanghpam pat jasan gabaw hte du shang wa nna kani lu sha ai salang Lamai Brang Tawng hpe shaga woi mat nna lam kaw adup zingri sat da ai lam nga ai hta hpang shani November (23) ya shani lagaw abyen daw da hkrum ai shi a moi mang hpe mare masha ni bai wa mu la ai re lam chye lu ai.

“MNDAA hpyen hpung ni gaw mare kata kani nanghpam pat jasan bungli shang na lam tsun shana ai lam, mare salang ni hte jahkrup ai lam mung n nga ai sha Pat Jasan shanhte gaw kam jang gabaw shatut nna shang ai ga rai nga ai.lama na shang na nga yang shanhte hkrai galaw mai ai bungli mung n rai nga ai, mare kaw nga ai mare salang ni hte mare masha ni hpe shanhte tsun ra ai.” nga nna Ginra masha langai tsun ai.

Kani lu sha ai masha mi raitim shi a mara hte seng nna n-ta masha ni hte san jahkrup ai lam mung n nga kam mara roi rip zing ri sat kau ai gaw hpyen gumshem lai ladat rai nna mungshawa ni a ntsa n galaw ging ai re hte mungshawa ni mung grai myit machyi yawn hkyen nga ai lam matut chye lu ai.

Dai ginra hta MNDAA hpyen hpung ni gaw ya na zawn pat jasan gabaw hte ka-ni nanghpam lu sha ai masha ni hpe rim zing ri adup abyen nhtawm dum nta masha ni hpe bai shana nna gumhpraw hte bai shaw la shangun ai lam ni mung byin nga ai re hpe matut sagawn chye lu ai.

Leave a Reply

*

This site uses Akismet to reduce spam. Learn how your comment data is processed.