Hpakant ginra kaw Myen hpyen gumshem dap ni mare kata hkan shamu shamawt shang wa ai majaw mungmare masha ni hprawng yen mat

Hpakant ginra, Seng Tawng hte makau grup yin hkan na mare ni hta November (24) ya shani Myen hpyen gumshem dap ni mare kata hkan shamu shamawt shang chying lau wa ai majaw mungmare masha ni hprawng koi yen mat ai lam na chye lu ai.

Dai Myen hpyen gumshem dap hpung ni gaw jahpawt manap jau kaw nna mungmasha nga ai mare kahtawng ni de shang shamu shamawt wa ai lam nga nna Seng Tawng, Kawng San hte Bum Nan mare hkan na mungmare masha ni gaw hkrit tsang nna ni nawn ai mare kahtawng ni, nawku jawng wang ni hkan hprawng koi yen mat ai lam Hpakant ginra masha langai tsun ai.

Seng Tawng Myen hpyen gumshem dap hte Balik dap ni bawm hte gap gasat hkrum ai lam nga ai zawn November (23) ya shani mung Sabaw maw mare makau hkan Modo hte shamu shamawt nga hkawm ai hpyen hpung hpe KIA hpyen hpung ni bawm hte hkap kapaw gasat dat nna Modo hten hkrum mat ai sha n-ga Myen hpyen gumshem dap maga na marai (1) si sum nhtawm marai (5) hkala hkrum mat ai lam ni nga majaw Myen hpyen gumshem dap kawn ya na zawn mungmasha nga ai mare kahtawng ni de shang chying lau wa ai rai na re nga nna ginra masha n kau tsun maram da ai.

Myen hpyen gumshem dap kawn Mungshawa nga ai mare kahtawng de sinat laknak hpai nna shang chying lau wa ai majaw mungmasha hpe dingsa wa ai sha n-ga lam shagu hta yakhkak dut dang hkrum wa na hpe ginra masha ni grai myit tsang nga ma ai re.

Leave a Reply

*

This site uses Akismet to reduce spam. Learn how your comment data is processed.