Sabaw makau kaw Myen hpyen gumshem dap Modo langai bawm kapaw hkrum ai majaw marai (1) si nna marai (5) hkala sawng

KIA Masat (9) Dap Ba, Masat (6) Dap Dung ginra, Seng Tawng, Sabaw maw mare makau kaw November (23) ya shana maga hkying (1:00) aten daram hta Myen hpyen gumshem dap ni Modo hte lai wa ai kaw KIA hpyen hpung ni bawm hte hkap gasat ai lam nga ai.

Myen hpyen gumshem dap HK.M.Y (111) ngu maram lu ai Myen hpyen la marai (8) hpung ni Modo langai hte Sabaw maw makau hkan shamu shamawt nga hkawm ai kaw KIA hpyen hpung ni bawm hte hkap kapaw gasat dat ai rai nna gasat gala a majaw Modo hten hkrum mat nna Modo gau ai wa asak si sum nhtawm marai (5) hkala hkrum mat ai lam shawng lam shiga kaw na chye lu ai.

Myen hpyen gumshem dap hpung ni gasat hkrum ai majaw Hpakant Myen hpyen dap kawn mung laknak kaba ni gap kapaw ai lam nga ai sha n-ga Myen hpyen gumshem dap Hk.M.Y (111) hpung ni mung ya aten Sabaw Maw mare makau grup yin hkan matut shamu shamawt nga hkawm ding yang re majaw gasat gala naw matut byin wa mai ai lam lit nga salang ni maram da ai.

November (22) ya shana hta mung Seng Tawng Myen hpyen gumshem dap hpe KIA hpyen hpung ni bawm hte sa gap gasat ai lam mung nga ai hta Myen hpyen gumshem dap maga na hkra hkala hkrum lam nga ai hpe matut chye lu ai.

Leave a Reply

*

This site uses Akismet to reduce spam. Learn how your comment data is processed.