Shwegu hte Indaw ginra kaw Myen hpyen gumshem dap hte KIA, KPDF pawnghpawm hpung ni gasat poi byin ai

KIA Masat (3) Dap Ba, Masat (12) Dap Dung ginra, Shwegu ginwang, Tan Dadar mare makau kaw November (18) ya jahpawt hkying (9:30) aten Myen hpyen gumshem dap hte KIA hpyen hpung ni gasat poi byin ai lam nga ai.

Myen hpyen gumshem dap Hk.L.Y (223) ngu maram lu ai hpyen hpung ni hpyen shamu shamawt chying lau hkawm nga ai kaw KIA pawnghpawm hpyen hpung ni hkap gap gasat ai kawn hkying hkum mi daram gasat poi byin wa ai re hpe chye lu ai.

Shwegu ginra hta November (15) ya shani mung Mai Nawng maga de na pru wa ai Myen hpyen gumshem dap hpyen n-gun (100) grup yin hpung ni hte KIA hpyen hpung ni Mung Leng kaw gasat poi laja lana byin ai lam nga nna Myen hpyen gumshem dap ni ninghtawn uphkang rung langai wan nat jahten kau ya ai lam mung nga sai re hte dai ginra hta Myen hpyen gumshem dap ni mungshawa dum nta wan nat jahten kau ya ai lam nga ai zawn laknak kaba gap shadam ai majaw mung mungshawa tsi rung hten hkrum ai lam nga ai lam chye lu ai.

Sagaing jarit Indaw ginra, Nabar makau kaw mung November (18) ya jahpawt hkying (8:00) grup yin kaw Kathar hte Htichyaik maga na hpyen n-gun jat lung wa ai Myen hpyen gumshem dap n-gun (150) grup yin lawm ai hpyen hpung hte KPDF pawnghpawm hpyen hpung ni gasat poi byin ai lam nga nna shiga lawnglam hkum tsup hpe matut sagawn nga ding yang re.

 

Leave a Reply

*

This site uses Akismet to reduce spam. Learn how your comment data is processed.