KIA Masat (9) Dap Ba, Masat (6) Dap Dung ginra, Gwi Hka makau kaw November (17) ya shani hkying (11:00) aten daram hta Myen hpyen gumshem dap hte KIA hpyen hpung ni gasat poi byin ai l am nga ai.
Myen hpyen gumshem dap ni Gwi Hka makau Sapbya Chyaung kawn shamu shamawt pru wa ai kaw KIA hpyen hpung ni bawm hte shawng hkap kapaw nna sinat laknak hte bai gap gasat ai hpang gasat poi byin wa ai re hte gasat poi hta Myen hpyen gumshem dap maga na hkra hkala si sum lam nga ai hpe sagawn chye lu ai.
November (15) ya shani hta mung KIA hpyen hpung ni shara jahkrat nga ai ginra de Myen hpyen gumshem dap ni hpyen shamu shamawt chying lau wa ai majaw Hwi Lung makau kaw KIA hpyen hpung ni hkap shingla gasat nna gasat poi byin ai lam nga ai hta Hwi Lung hpyen dap hte Gwihka Myen hpyen gumshem dap kawn mung laknak kaba ni gasat poi byin ai shara de gap bang ai lam nga sai re.
KIA Masat (6) hte Masat (26) Dap Dung ginra, Gwi Hka, Sezin ginra ni hta N-dai laman Myen hpyen gumshem dap ni hpyen n-gun, hpyen lang rung rai ni hpe htaw shalai la ai lam ni galaw nga ai majaw hpyen Nbungli ni hte shimlam la ya nna hkrup mara gap bang ai lam ni mung galaw nga ai lam matut sagawn chye lu ai.