Shwegu ginra hte Gwi Hka kaw KIA hte Myen hpyen gumshem dap ni gasat poi byin

KIA Masat (3) Dap Ba, Masat (12) Dung ginra, Shwegu ginwang, Ubat Ginwang daw, Mung Leng mare kaw November (15) ya jahpawt hkying (4:45) Am aten hta Myen hpyen gumshem dap hte KIA hpyen hpung ni gasat poi byin ai lam nga ai.

Myen hpyen gumshem dap Hk.M.Y (319), hte Hk.M.Y (601) Dap pawnghpawm hpyen n-gun (100) grup yin lawm a hpung ni Mai Nawng maga de na lagaw lam hku Mung Leng mare grup yin de hpyen shamu shamawt chyinglau shang wa ai majaw KIA hpyen hpung ni hkap shingla gasat ai kawn gasat poi byin wa ai re lam shawng lam shiga kaw na chye lu ai.

Gasat poi byin ai hpang jahpawt hkying (6:00)Am aten hta Myen hpyen gumshem ni gaw Mung Leng mare na mungshawa dum nta, gat seng ni hkan laja lana sawk jep hkawm ai lam ni galaw nna hkying (7:50) Am aten Mung Leng ninghtawn uphkang rung hpe wan nat jahten kau da ya ai lam ni mung nga ai hpe sagawn chye lu ai.

Dai hpang Myen hpyen gumshem dap hpung ni gaw Man Na maga de bai matut shamu shamawt hkawm wa sai re hte matut nna shamu shamawt nga ai rai yang gasat poi naw matut byin wa mai ai lam lit nga salang ni maram da ai.

KIA Masat (9) Dap Ba, Masat (6) Dap Dung ginra, Gwi Hka kaw mung November (15) ya shana de hkying (1:25) aten Myen hpyen gumshem dap ni hpyen shamu shamawt hkawm nga ai kaw KIA hpyen hpung ni hkap shingla gasat nna gasat poi byin ai lam nga ai hpe chye lu ai.

KIA Masat (26) Dap Dung ginra, Nawnglut ginwang kata kaw mung November (14) ya shani hkying (12:00) aten hta Myen hpyen gumshem dap ni a Jet Nbungli ni numdaw lahkawng lang wa gap gasat kau da ai lam ni mung nga sai hpe chye lu ai.

Leave a Reply

*

This site uses Akismet to reduce spam. Learn how your comment data is processed.