Mungmyit Sinli Ga, Kachin Sub-state, KIA Masat (4) Dap Ba, Masat (8) Dap Dung ginra Sinli Kawng Ra npu Pang O hkaraw kaw September (28) ya jahpawt hkying (9:00) aten laman Myen hpyen gumshem dap hte KIA hpyen dap ni gasat poi byin ai lam nga ai.
Dai ginra hta Myen hpyen gumshem dap Tatma (77) hte (101) pawnghpawm dap ni kawn September (27) ya shani kawn hpyen man (3) hte KIA hpyen dap nga ai shara de htu shadut wa ai majaw gasat poi matut manoi byin wa ai rai nna Myen hpyen gumshem dap ni gaw hpyen n-gun jat la nna naw matut htu shadut nga ai majaw gasat poi laja wa na masa nga ai hte ya aten dai ginra hta Ph line, Internet line ni pat tawn da ai lam nga ai hpe mung chye lu ai.
KIA Masat (10) Dap Ba, Masat (2) Dap Dung ginra, Pangti hte Nati lapran kaw mung September (28) ya jahpawt hkying (9:23) aten kaw na shani hkying (12:30) aten laman Myen hpyen gumshem dap hte KIA hpyen dap ni gasat poi byin ai lam chye lu ai.
Myen hpyen gumshem dap n-gun (70) grup yin lawm ai hpung ni Modo (5) hte Kunlung lam de lai lung wa ai kaw KIA hpyen hpung ni hkap shingla gasat ai kawn numdaw lahkawng lang gasat poi byin wa ai re hte Myen hpyen gumshem dap a modo n kau hten hkrum mat ai lam shawnglam shiga kaw na chye lu ai.
Ya aten Myen hpyen gumshem dap n-gun (70) hpung ni gaw Nati kaw na Kunlung de lagaw lam hku nna matut shamu shamawt chyinglau wa ai majaw gasat poi naw matut byin wa mai ai lam hte KIA Masat (6) Dap Ba, Masat (9) Dap Dung ginra mayan hkan mung Kuthkai kaw na Myen hpyen gumshem dap ni shamu shamawt chyinglau hkawm nga ai majaw gasat poi laja wa na masa nga ai lam lit nga salang ni maram da ai.