Myen hpyen gumshem dap kawn Wunpawng Amyu Shayi langai hpe sinat hte gap sat kau

Mogawng ginra, Sarmaw, Kanyin Myai kaw dap jung ai Myen hpyen gumshem dap ni September (23) ya shana hkying (7:30) aten daram hta Wunpawng Amyu Shayi langai hpe sinat hte gap sat kau ai lam na chye lu ai.

Sinat hte gap sat kau hkrum ai amyu shayi gaw Kawa Yang mare na Ji Nan asak (30) jan rai nna Hk.M.Y (383), (384) hpyen dap wang mayan nga hkawm ai kaw Myen hpyen gumshem dap ni a sinat hte gap sat kau hkrum ai re lam, dai amyu shayi jan gaw myit hkamja lam nnga ai re hpe mung sagawn chye lu ai.

Kanyin Myai hpyen dap Hk.M.Y (383) (384) dap ni gaw lai wa sai ten hkan mung shanhte a hpyen dap wang shawng hku shana aten lai wa lai sa galaw ai Modo, Sengke ni hpe sinat hte hkan gap ai lam ni galaw nga ai majaw asak si sum mat ai ni mung nga sai re hpe chye lu ai.

Dai Myen hpyen gumshem dap ni gaw aten ntam sinat laknak gap shadam ai lam mung jahkring hkring galaw ai sha n-ga ya na zawn lam ntsa lai wa ai ni hpe sinat laknak hkrup mara hkan gap ai majaw dai ginra mayan na mungmare masha ni shana aten hkying (6:00) aten hpang daw kaw nna mare kata pru prang hkawm ai lam nnga ai hte hpyen dap wang shawng hku Modo, Sengke lai hkawm ai lam mung nnga daram re lam ginra masha ni tsun ai kaw na chye lu ai.

Leave a Reply

*

This site uses Akismet to reduce spam. Learn how your comment data is processed.