Hpakant lam, Nam Ya mare P.T.Ts ningbaw U Htun Htun Oo gap sat hkrum ai majaw Myen hpyen gumshem dap hte P.T.Ts hpung ni kawn mare kata laja lana jep chyoi ai lam ni galaw nga ai hpe chye lu ai.
Dai P.T.Ts Ningbaw wa gaw September (20) ya jahpawt hkying (7:30) aten daram hta hpyen dap kawn yu wa ai kaw shi a dum nta shawng kaw du wa ai hte sengke jawn nna sa wa ai kadai re tup hkrak n chye la lahkawng kawn sinat hte gap sat kau da hkrum ai re hpe chye lu ai.
U Htun Htun Oo gap sat kau hkrum ai hpang Myen hpyen gumshem dap hte P.T.Ts hpung ni gaw mare kata sinat gap kapaw nna ginra mungmasha ni hpe san jep ai lam ni galaw nga ai hte Myen hpyen gumshem dap kawng kaw nna mung makau grup yin de laknak kaba ni gap bang nga ai majaw ginra masha ni hkrit tsang maja let sha nga nga ai hpe chye lu ai.
Nam Ya Myen hpyen dap hte P.T.Ts pawnghpawm hpung ni gaw lai wa sai ten hkan mung makau grup yin de laknak hkrup mara gap shadam ai majaw mungmasha hkra hkala hkrum ai lam , dum nta hten hkrum ai lam ni nga sai re hpe chye lu ai.