Myen hpyen gumshem dap ni Mungshawa ni a gat seng wan nat jahten nna gat seng madu hpe rim woi mat

Hpakant Lawnghkang ginra, Maden Yang (Maw Bung mare) kaw September (14) ya jahpawt hkying (5:30) aten hta Myen hpyen gumshem dap ni mungshawa ni a gat seng langai wan nat jahten kau da ya nna seng madu hpe mung rim woi mat ai lam ginra masha ni tsun shana wa ai kaw na chye lu ai.

September (14) ya jahpawt hkying (2:20) aten hta Sha-it Yang (Lepyin) bawmyam dap kaw na ngu maram lu ai Myen hpyen gumshem dap ni n-gun (40) grup yin lawm ai hpung ni Pajero Modo (6) hte Maw Bung mare na Kade Oo gunrai dut seng de sa wa nhtawm PDF hpe madi shadaw ai ngu tsun nna gat seng hpe Dat Si jaw nhtawm wan nat kau da ya ai majaw gat seng hte seng madu ni a Modo kaji langai wan hkru hkrum mat lam, seng madu U Kyaw Win Naing hpe gaw rim woi mat ai re hpe na chye lu ai.

September (13) ya shana maga hkying (5:40) aten hta Maw Bung mare lam masat (9) hte (10) lam nbraw na Kade Oo gunrai dut seng mayan kaw sinat gap kapaw shangoi ai n sen ngoi ai lam ni nga ai majaw Myen hpyen gumshem dap kawn ya na zawn gat seng hpe wan sa nat jahten kau ya ai masa re lam ginra masha ni tsun maram da ma ai.

Myen hpyen gumshem dap ni gaw gat seng hte Modo wan nat jahten kau da ya nna Sanghka mahkrai kaw sinat laknak wa gap kapaw kau da nhtawm bai nhtang wa sai lam sagawn chye lu ai.

 

Leave a Reply

*

This site uses Akismet to reduce spam. Learn how your comment data is processed.