Kachin State Comprehensive University Opening Ceremony hpaw hpawng galaw

NUG Asuya Hpaji Hkringmang Dap kaw na hpaw ai, Kachin State Comprehensive University (KSCU) Opening Ceremony hpaw hpawng lamang hpe September (12) ya shani Laiza Muklum kaw galaw la lu sai re.

Dakkasu hpaw ai a yaw shada lam hpe KSCU Dakkasu byin tai wa hkra woi awn galaw ai Ningtau Hkringmang Daju (Vice-chancellor) Dr. Aung Ko Ko Lin tsun ai hta “Jinghpaw mungdaw hte jarit mayan hta nga ai, mung shawa ni, madang tsaw hpaji sharin lu hkra ladat shaw ai lam, bai du wa na shawng lam Federal mungdaw a ra nga ai lawng lam ni hpe ningja hpring hpring shangai shaprat ya na matu, ndai ginra hta nga ai makau grup yin manghkang, hkailu hkaisha manghkang zawn re ni hpe hpaji lam hte mahtai tam lu na matu, Jinghpaw mungdaw hta mungkan madang dep dakkasu mungkan mungdan ni hte dat tawk mahkri shawn lu na matu hte Myen mung dingdung daw nga ai mungshawa yawng a kamhpa ging ai Dakkasu byin tai wa hkra galaw sa wa ai lam re” nga nna tsun ai.

KSCU hpe 2022 May shata 31 ya shani hpaw hpang nga sai rai nna, 2022 ning hpaji ladaw hta Myen jawng tsang (10) awng ai jawngma ni hta lai nna, kaga jawngma ni yawng hte Shanglawt jawng tsang (10) awng ai jawngma yawng hpe hkap la ai rai nna, Mai Ja Yang Dakkasu hta awng sai ni gaw third year hte final mai wa lung ai lam chye lu ai.

Ndai hpawng hta NUG hpaji dap na lit nga ai salang ni sa du shang lawm ai hte du sa masha yawng 150 jan re lam chye lu ai.

Leave a Reply

*

This site uses Akismet to reduce spam. Learn how your comment data is processed.